Timmisartuussinissat tamarmik unitsinneqarput
Air Greenlandimi pisortat ataasinngornermi ullaakkut nalunaarput timmisartuussinissat sapaatip akunnerani uani tamarmik unitsinneqartut.
Sapaatiummat januaarip 9-ani unnuakkut Air Greenlandip timmisartortartuisalu akornanni aaqqiagiinnginnerup nassataanik timmisartunik suliartornissamut mattussineq atuutilerpoq. Isumaqatigiinniarnerit ajalusoormata ingerlatsiviup timmisartortartunik timmisartunilu saqisunik suliartornissamut mattussinissamut ilimasaarutaa atuutilerpoq. Tassa Air Greenlandip timmisartuussinissai tamarmik unitsinneqarput, pisortallu ataasinngornermi ullaakkut nalunaarput tamanna sap.ak. naallugu atuutissasoq, Air Greenlani tusagassiutitigut nalunaaruteqarpoq.
- Ilaasussat Air Greenlandip timmisartuussinissaanut bilitsisimasut toqqaannaq nalunaarfigineqassapput, bilitsimillu suussusaat apeqqutaatinnagu, utertinnissaannik neqeroorfigineqassallutik. Tamannali kissaatigineqanngippat, angalasussat allattorsimaffianiiginnartoqassaaq, aaqqiagiinnginnerlu qaangiuppat ulloq suna aallartussaagaluarneq malillugu tulleriiaakkani aallartussani inissinneqassapput, Air Greenland allappoq.
Neqeroorut taanna sap.ak. uani angalasussanuinnaanngitsoq, januaarilli 22-at ilanngullugu angalasussaagaluartunut aamma atuutsinneqarpoq.
- Oqaatigineqareersutut sap.ak. uani angalasussaagaluit piffissat aallarfissaagaluartut malillugit Air Greenlandimit nalunaarfigineqassapput, ullormullu angalasartut 1000-t missaanniimmata, suliaq taanna annertullunilu piffissaajarnarpoq, taamaattumik angalasussat qinnuigaavut paasinnillutillu naammagittaqqullugit. Apeqqutissaqaraanni saaffiginnittarfimmut pisumut atatillugu pilersinneqarsimasumut saaffiginnittoqaannarsinnaavoq. Kalaallit Nunaanni oqar. +299 34 33 35-mut imaluunniit kontakt@airgreenland.gl –mut ullukkut nunatsinni nal. 08-miit 20-mut. Danmarkimi oqar. +45 3246 2243-mut imal. glcopenhagen@airgreenland.dk nal. 07-miit 23-mut Danmarkimi nal. malillugu, Air Greenland allappoq.
Air Greenlandimut timmisartuussinerinut allakkanik nassiussanillu isumaginnittartut aamma timmisartuussinerit unitsinneqarnerinik nalunaarfigineqareerput. Taamaattumik Air Greenlandip allakkanik nassiussanillu tigooraavinut nunatsinni Danmarkimilu allakkanik nassiussassanillu tunniussisoqarsinnaanngilaq.
www.airgreenland.gl ullut tamaasa aaqqiagiinnginnermut tunngasutigut allanngortoqarnersoq paasissutissanik nutaanik ikkussisarniarpoq.