Laura Bodil-imik nersornaasigaassasoq siunnersuutigaat
Isiginnaartitsisartoq 14-inik ukiulik Laura Skaarup Jensen tupaallassimavoq
Danmark-imi ukiup isignnaartitsisartua maanna toqqarneqarpoq. Bodil-imik nersornaaserneqartussat allattorsimaffiat naammassineqarpoq, ilagaallu Laura Skaarup Jensen 14-inik ukiulik. Nersornaasigassanut 'arnatut isiginnaartitsisutut pingaarnerit tlliattut' toqqarneqartussanut ilaavoq, Eksperimentet-imi inuttaasimanini pissutigalugu.
Taamatut nersornaasigassatut siunnersuutigineqarneqarsimalluni Laura Skarup Jensen-ip sisamanngormat unnukkut paasivaa. Soorunami assut nunnaarpoq.
– Anaana arpallunga ornippara, pississaarlunga nutaarsiassamik oqaluttuullugu, Laura nuannaarpalalulluni oqaluttuarpoq.
- Assorujussuaq nuannaarpunga, nersorniarneqarneralu nuannaarutigalugu. Tamanna assut nuannersoq isumaqarpunga, Laura Ilulissani inunngorsimasoq peroriartorsimasorlu oqarpoq. Taamatut inuttatut pitsaanertut nersornaaserneqarnissamik siunnersuutigineqarneq Lauramut isumaqartorujussuuvoq, maannakkulli meeqqat atuarfianni atuarnini pingaartinneruaa.
- Siunnersuutigineqarneq uannut isumaqartorujussuuvoq, 10. klassemili atuarnera naammasseqqaassavara, aammalu ilinniarnertuutut assut atuarusullunga, tassanilu sunngorniassanerlunga paasiumaarpara, Laura Skaarup Jensen oqarpoq, Storvorde-mi Tofthøjskolen-imi 8. klassemi atuartoq.
Suli amerlanernik
Eksperimentet-imi niarsiaqqatut Karen-itut inuttaareerluni Laurap isiginnaartitsisartunngornissani takorluugarilersimavaa. Filmiliorneq nuannarilluinnarsimavaa.
- Filminik amerlanernik filmilioqataanissara kissaatigaara. Peqataaqqullunga neqeroorfigineqarnissara nuannarluinnassaaq, isiginnaartitsisartoq 14-inik ukiulik oqaproq.
Laura Skaarup Jensen ilaqutani ilagalugit Storvorde-mi najugaqarpoq. Arnaa Johanne Jensen Qasigiannguaneersuuvoq, angutaalu Laras Skaarup Jensen Storvorde-meersuulluni. laura nukarlernik marlunnik qatannguteqarpoq, Søren arfineq-pigasunik ukiulik aamma Heidi arfinilinnik ukiulik.
Laura qulingiluanik ukioqartoq ilaqutariit Danmark-imut nuupput. Kalaallit Nunaannilu ilquttani maqaasisarpai.
- Ilulissani Nuummilu ilaquttakka maqaasisarpakka. Aamma Qasigiannguani ilaquttakka ilaanni eqqarsaatigisarpakka, Laura Skaarup Jensen oqarpoq.