Nungusaannginneq naakkittaatsuliornerluunniit

Ataatsimeersuarnermi apeqquserneqassaaq arfanniarnq puisinniarnerlu nungusaataanngitsumik ingerlanneqarnersut imaluunniit naakkittaatsuliornerunersut.

Beatlesini nipilersortartuusimasoq Paul McCartney oqarnikuuvoq arfanniarneq naakittaatsuliornerusoq kajumissaarillunilu "piniarnagit isiginnaartaqqullugit" Franskip filmiliortittartup tusaamasap Brigitte Bardotip ukiut 30-t sinnerlugit puisinniarneq akiorniasimavaa oqarluartaatigalugu "amernik atisaqarnermit mattaangarusunneruvunga". Aappaatigut piniartut tunngavilersuutigaat immap pisuussutai nungusaataanngitsumik atorneqartut.

Ukiorpassuarni illersuisut akerliusullu isummaminnik tusagassiorfitsigut poltiikkikkullu tunngavimminnit saqqummiussisarput. Illua'tungeriilli toqqaannartumik oqaloqatigiinneq ajorput. Taamaattumik Folketingimi Den Nordatlantiske Gruppe ataatsimeersuartitsiniarpoq ammasumillu oqallitsitsiniarluni illua'tungaani Atlantikup avannaani piniartut aalajangiisartullu illua'tungaanilu uumasunik avatangiisinillu illersuiniaqatigiiffiit akornanni.

Puisinniarnermut arfanniarnermullu akerliullutik nunat tamalaat suliniutaat 1970-ikkunniilli amerliartorismapput. Tamanna peqatigalugu nunani tamalaani politikerit piniarnermut akerliunerat annertusiartorpoq - kingullermik EU-p puisinit tunisassianik eqqusseqqusiunnaarneratigut, nunalli inoqqaavinik attuinngitsumik.

Atlantikup avannaani piniartut poltiikerillu tupigusuutigaat kamaatigalugulu inuiaqatigiit immap pisuussutaanik inuussutillit - kinguaariippassuarni nungusaataanngitsumik atuisarsimasut - maanna nunarsuup sinneranit mattunneqarnissamik niuernikkullu killilersuiffigineqarnissamik ulorianartorsiortinneqarmata. Kalaallinut savalimmiormiunullu puisinniarneq arfanniarnerlu tunngaviusumik pisinnaatitaaffiupput pingaarutillit, ullumikkut ilaatigut soqutigisaqaqatigiiffinnit nukittuunit EU-milu aalajangiisartunit ulorianartorsiortinneqartut, Folketingimi Nordatantiske Gruppe oqarpoq, tassanilu ilaasortaapput Høgni Hoydal Savalimmiuneersoq aamma Juliane Henningsen, Kalaallit Nunaanneersoq.

Ataatsimeersuarnermi, Christiansborgimi januaarip 19-ianni 2011 Fællessalenimi ingerlanneqartussami, paasineqarumaarpoq illu'atungeriit akornanni paaseqatigiittoqarsinnaanersoq imaluunniit isummat ima imminnut akerliutiginersut, illua'tungeriit oqaloqatigiinnissaat ajornavilluni.

Ataatsimeersuarnermi sammisat marluk pingaarnertut aalaaviussapput:

Imm. 1: ingerlatsineq, eqqissisimatitsineq piniariaatsillu

Immap pisuussutaanik atuinermut isiginninnerit isummallu assigiinngitsut aporaappat, Atlantikup avannaani nunat aalajangiusimammassuk nungusaataanngitsumik puisinniarsinnaatitaallutillu arfanniarsinnaatitaallutik, uumasunik avatangiisinillu illersuiniaqatigiiffiit ilaasa sorsuutigigaat puisit arferillu eqqissisimatinneqassasut tunngavilersuutigalugulu uumasunit tunisassianik mattussinissaq niuernikkullu killilersuinissaq? Nungusaataanngissuseq puisinut arfernullu atuuppa, imaluunniit avatangiisini piulersimappat illernartut? Tamatuma saniatigut piniariaatsit naakkittaatsuliorneruppat imaluunniit ileqqorissutsikkut illersorneqarsinnaappat?

Imm. 2: Paasisitsiniaanerit kinguneqaatillu

Uumasunik avatangiisinillu illersuiniaqatigiiffiit puisinniarnermut arfanniarnermullu akerliunerat ulluinnarni nunani tamalaani tusagassiorfinni takkuttarput. Paasisitsiniaanerit piviusunik tunngaveqarpat? Angusaqarniarluni pissusiviusut equtinneqarpat? Arfanniarnermut puisinniarnermullu akerliuniarnerit Atlantikup avannaani innuttaasunut sunik kinguneqaateqarpat?

Saqqummiussisut ilagissavaat politikerit, piniartut suliniaqatigiiffiillu assigiinngitsut.

Ataatsimeersuarnermut kikkut tamarmik tikilluaqquneqarput. Peqataaniarluni nalunaartoqarsinnaavoq uunga dnag@ft.dk, 13 januar 2011 nallertinnagu. Ataatsimeersuarnissaq pillugu annertunerusumik atuarit quppernermi nittartakkami www.dnag.dk.