2011-mi Unnuk Kulturisiorfik piareersarneqarpoq

Suliffeqarfiit, ingerlatsiviit peqatigiiffiillu ilaqutariinnut tamanut pissanganartnik sammisassaqartitsissapput.

Nunami tamarmi taarnerata nalaani nalunaaqquttap akunneri marlussuit qaangiuppata inuppassuit angalaalissapput. Ukiut tamaasa pisartumi illoqarfiit nunaqarfiillu 15-it peqataassapput, ilaatigut kommunet allaffii, iliniagaqarfiit, nukissiorfiit, kulturikkut illorsuit, politeeqarfiit, atuagateqarfiit, peqatigiiffiit, namminersortut suliffeqarfii aktietigullu ingerlatsiviit angisuut tamanut ammatinneqassallutik.

Nuummiinnaq orninneqarsinnaasut 40-t tamanut ammatinneqassapput.

Illoqarfinni tamani pisussat kommunet internetimi quppernanni uani takuneqarsinnaapput, www.kulturnat.gl. Ukunani pisussat takuneqarsinnaapput: Aasiaat, Qeqertarsuaq, Qasigiannguit, Ukkusissat, Upernavik, Ilulissat, Narsaq, Attu, Sisimiut, Maniitsoq, Qaqortoq, Ikerasak, Qaarsut, Kangaatsiaq, Nanortalik.

Illoqarfinni buseqarfiusuni busit unnukkut akeqanngitsumik ilaaffigineqarsinnaassapput.

Maani Sermitsiaq.AG-mi unnummi kulturisiorfimmi assilisat tamaasa ilanngukkusukkaluarpavut. Taamaattumik tamanut kajumissaarutigissavarput assit e-mailimut uunga nassiuteqqullugit: redaktion@sermitsiaq.ag. Asseq sumik imaqarnersoq naatsumik allaaseriuk.

Nuannisarluarisi, namminerlu qaammartartunik atisarmioqarnissaq eqqaamallugu.

Powered by Labrador CMS