Meeqqat atugarisaat pillugit Danmarki avoqqaarineqarpoq

Meeqqat atugarisaat eqqarsaatigalugu sutigut arlalitsigut Danmarki kinguarsimasorujussuuvoq, immikkut ilisimasalik naliliivoq.

Danmarkip pinerluttutut pineqaatissinneqarnissaanermut ukiut appasinnerpaaffissat 14-inut apparsimavai tamannalu sammineqassaaq FN-ip meeqqanut komitea ullumi Schweizimi ataatismiinnerain. Ass.: Polfloto: Finn Frandsen

Sooq meeqqat taama amerlatigisut angerlarsimaffiup avataanut inissinneqartarpat iliuuseqarnissamut pilersaaruteqanngitsumik?
Meeqqanik inussiaateqarnermut sooq Danmarki sakkortunerusumik iliuuseqanngila?
Sooq meeqqat immikkoortitaallutik parnaarunneqartarpat aamma sooq parnaarussivinni inersimasulinni parnaarunneqartarpat?
Tassa apeqqutit paquminartut ilaat, qallunaat atorfillit 20-t missaanniittut ullumi, ataasinngornermi, Schweizimi Genevemi akiniagassaat, taamatut allappoq Poltiken.

FN-ip meeqqanut komitéanit apeqqutit paquminartut takuneqarsinnaapput allakkiami Politikenip pissarsiarisimasaani. Taakkunani ilaatigut atuarneqarsinnaavoq meeqqanut komitép aamma paaserusukkaa Danmarkimi sooq meeqqaanut ombudsmandeqanngitsoq, Norgemisut, Sverigemisut, Finlandimisut, Islandimisut europamilu nunat allanisut?

FN-ip meeqqanut komitéa ukiut tallimakkaarlugit tamakkuninnga naliliisarpoq. Qallunaat meeqqanik suliniaqatigiiffii arlallit Politikenimut naliliipput qallunaat sutigut arlaitsigut kinguarsimasorujussuartut nalilerneqassasut.

Naalakkersuisut meeqqanut tunngasuni siunnersortaanni Børnerådimi siulittaasup Lisbeth Zornig Andersenip ilaatigut pissanngatigaa qallunaat aallartitaat atorfillit ullumi qanoq illersorniassaneraat Danmarkip siorna pinerluttutut pillarneqarnissamut ukiut appasinnerpaaffissaat ukiunut 14-inut appartissimaneraa.

- Meeqqanut isumaqatigiissummi ersarissumik allassimavoq inatsisit allanngortinneqaraangata meeqqat pisariaqartitaat isumagineqartassasut. Meeqqalli pisariaqartitaat pineqanngillat katsorsarnagit pillarneqartarpata, Lisbeth Zornig Andersen Politikenimut oqarpoq.

Inger Neufeldip, Red Barnetimi meeqqanut politikkimi siunnersortip, tikkuarpaa FN-ip isorinnissutai arlallit kingullermik 2005-imi naliliinermit nangitsinerusut. Taamanikkut Danmaki ilaatigut isornartorsiorneqarpoq meeqqanik avissaartillugit parnaarussisarneranik. Ullumi ataatsimiinnissamut takussutissanit takuneqarsinnaavoq tamanna suli pisartoq. Taamanikkut Børnekomitep ujartorpaa oqartussaaffeqarfik meeqqat inuunermi atugarisaannik naliliisarsinnaasoq. Tassaasinnaavoq meeqqanut ombudsmandi imaluunniit Meeqqanut siunnersuisooqatigiit.

- Qularnanngilluinnarporli naalakkersuisuyt taamani meeqqanut komitep inassuteqaatai tusaaniarsimanngtikkaat, taamaattumik qularnanngilluinnartumik isornartorsiorneqaqqissaagut, Inger Neufeld Politikenimut oqarpoq.

Powered by Labrador CMS