Politiit Kattuffiata nunatsinnut angalanermini 600.000-t atorpai
Ulluni tallimani Kalaallit Nunaanniinneq - ulloq ataaseq ataatsimiilluni Politiit Kattuffiannut 600.000 koruuninik akeqarpoq, taamatut allappoq B.T.
B.T.-p Politiit Kattuffiat sammilerpaa siorna apriilimi ulluni tallimani Kalaallit Nunaanniissimammat maani siulersuisuunerit ataatsimiillutik. Tamanna pivoq Ilulissani.
Angalaneq, ulloq ataaseq ataatsimiinnertalik ullunilu sisamani nunatsinni takornariarnertalik 600.000 koruunit missarpiaannik akeqarsimavoq.
B.T.-p saaffiginninneratigut Politiit Kattuffiata angalanermi aningaasartuutit nammineq paasissutissiissutigisimavai. Inunnut 55-inut angalaneq inummut ataatsimut 14.000 koruuneqarsimavoq.
- Kalaallit Nunaat qallunaat politiivisa aamma akisussaaffigaat. Kalaallit Nunaanni ataatsimiinnissaq toqqarsimavarput pissutigalugu Kalaallit Nunaanni politiit peqatigiiffiat ukioq manna ukiunik 25-inngortorsiorluni nalliuttorsiormat, Politiit Kattuffianni siulittaasoq B.T.-mut oqarpoq.