Parnaarussivik matoqqasoq kinguartinneqarpoq

Nuummi parnaarussivik matoqqasoq siusinnerpaamik 2015-ip naalernerani atulissaaq

Nuummi parnaarussivimmti matoqqasumit Herstedvesterimi parnaarussat tiguneqassapput, taassumali sananeqarnissaanut aningaasartuutissat amerlanerusut sanaartornissaq kinguartippaat. Ass.: Sermitsiaq

Nuummi parnaarussiviup matoqqasup ammarneqarnissaa kinguartinneqarpoq. Tamanna atuarneqarsinnaavoq inatsisinik atortitsinermut ministerip Lars Barfoedip Folketingimi Kalaallit Nunaannut Ataatsimiititaliami allagaani.

Siusinnerpaamik 2015-ip naalernerani Nuummi parnaarussivik matoqqasoq atulissaaq.

Parnaarussiviup sumi sananeqarnissaanik pilersaarutit allanngortinneqarsimapput Tamannalu pissutigalugu parnaarussiviup tungaanut nutaamik aqqusinniornermi sanaartornermi aningaasartuutissat amerlisimapput.

Inatsisinik atortitsinermut ministeri Naalakkersuisut siulittaasuannut Kuupik Kleistimut siusinnerusukkut oqarsimavoq aningaasartuutit ilassutissaasa avinneqarnissaat isumaqatigisinnaallugu.

- Oqaatigineqartutut neriuutigaara aningaasartuutissat, maanna suliniutip ingerlanneqarneranik unitsitsisut, sukkanerpaamik isumaqatigiissutigineqarumaartut, taamaasilluni parnaarussivimmik nutaaliaasumik ullutsinnut naleqquttumik pilersaarusiorneq sananissarlu ingerlaqqinniassammata, inatsisinik atortitsinermut ministeri Lars Barfoed Kuupik Kleistimut allappoq.

Powered by Labrador CMS