Ingerlatsiviit nukittunerusut
Nunami maani praktikkerfissanik amerlanerusunik kinguneqassapput, Nusuka-p siulittaasua Gerth B. Lynge oqarpoq
Taamaattumik tusagassiorfinnut nalunaarutikkut Naalakkersuisut kajumissaarpai nunami maani selskabit kalaallinit pigineqartut nukittorsaqqullugit.
- Praktikkerfissanik amerlanerusunik pilersitsinissamik Naalakkersuisut kissaataat piviusunngortinniarlugu aqqutissat ilagaat selskabit nunami maani pigineqartut nukittorsarnissaat, tamakkua tassaammata praktikkertunik tigusisartut. Taamaattumik selskabit tamakkua nukittorsarneqarnerat praktikkerfissanik amerlanerusunik pilersitsinissamut ataqatigiippoq. Pisortat sanaartortitsisuni annersaammata pissusissamisoorpoq entreprenørinut, nunami maani sanaartugassanik suliassinneqartunut, piumasaqaateqarnissaq, Gerth B. Lynge tikkuaavoq.
Nunavut-mi aaqqissuussineq
- Suliniut pitsaasoq tassaassaq Nunavut-mi aaqqissuussinerup, Nunavummi Nagminiqaqtunik Ikajuuti (NNI Policy), assinganik eqqussinissaq. Tamanna kalaallit ingerlatsiviisa nunat allamiut aningaasaatilissuit soqutigisaannit naapertuilluanngitsumik unammillerneqarnermi aalajaallisarnermi periarfissaannut aalajangiisuussaaq taamaasilluni praktikkerfissanik amerlanerusunik pilersitsilluni, Gerth B. Lynge Nusuka-mit tusagassiorfinnut nalunaarummi inatsivoq.
Taanna isumaqarpoq aaqqissuussinikkut ingerlatsiviit nunami maaniittut piffissaq ungasinnerusoq isigalugu piginnaasaminnik aningaasaqarnerminnillu unneqqarissumik piviusumillu nukittorsaanissaat qulakkeerneqaqataassaso, tamatumani ilanngullugu inuiaqatigiinni nalinginnaasumik ineriartorneq.
- Assersuutigalugu suliarinnittussarsiuussinermi sinaakkutat ima aaqqissuunneqarsimapput, ingerlatsiviit Nunavut-mi tunngavillit 7%-imik unammillernermi iluaquserneqartarput, ingerlatsiviillu Inuit pigisaat aamma saniatigut 7%-imik unammillernermi ilaquserneqartarput, nunamilu ingerlatsiviit (sumiiffinni ataasiakkaani suliassaqarfiusuni) aamma 7%-imik iluaquserneqartarlutik.
- Tamanna peqatigalugu inatsit ima ilusilersorneqarsimavoq ingerlatsiviit, suliarinnittussarsiuussinermi aalajangersimasumik aningaasartalinni ajugaasut pisussaaffeqartinneqarlutik sulisuminnik ilinniagaqartitseqqinnissamik ilinniagaqartitsinermut pilersaarusiaq malillugu, soorluttaaq sulisorisat nunaqavissut ikinnerpaaffissaannik piumasaqartoqartoq il.il.
NUSUKA-p isumaa malillugu ingerlatsiviit saniatigut aamma iluaquserneqartassapput selskabit praktikkertunik sulisoqaraangata. Assersuutigalugu 5-10%-imik iluaqutissartalerlugit, suliassap annertussusisaa apeqqutaalluni.
Inatsit taamaattoq atuutilersinneqarsinnaasuuppat NUSUKA-p qularutiginngilaa ingerlatsiviit maaniittut anningaasaqarnerat amerlassusaallu annertusingaatsiassasoq, soorluttaaq ingerlatsiviit suliassanik anginerujartuinnartunik eqikkarnerusunillu tigusisalersinnaasut taamaasillunilu sanaartornerup iluani amerlanerut ilinniagaqarnissaannut aqqutissiuussillutik, Gerth B. Lynge naliliivoq.