Inuussutini pingaarnerutitaq: Suliffeqarfiit akornusernagit

Ukioq qaangiutingajalerpoq. Kalaallit Nunaata oqaluttuarisaanerani ukioq 2010 pingaarnerpaanut ilaassaaq. Cairn Energy Kitaata sineriaata avataani uuliaqarsinnaaneranik nassaarmat pissutaanersaavoq, sumiiffinnilu allani uuliamik ujarlertoqarnissaa tamatuma kingorna annertuumik piumassuseqalersitsivoq.

Uuliamik ujarlernermi annertunerusumik suliaqalerneq tamatuma kingunerissavaa.

Taamatut inuussutissarsiornissamut periarfissaq aallaqqaataanit atorluarniarneqartariaqarpoq, nunatsinni tamarmi kiffartuussinerup sapinngisamik annertunerpaamik atorniarneqarnissaa piumasaqaatigalugu.

Aatsitassallu qaqutigoortut piumaneqaleraluttuinnarnerat tamatumunnga atatillugu maluginiarneqarnerusariaqassaaq.

Taakkulu atorluarniarneqarnissaat pillugu avataanit tatineqarnissaq aamma maluginiarneqassaaq, aatsitassat ilaat nunarsuarmi sumiiffinni aalajangersimasuni taamaallaat nassaassaammata.

Aatsitassat nunatta avataani pisariaqartinneqarnerat nunatsinni maluginiarneqartariaqarpoq. Aatsitassallu piiarneqarnissaat qanoq ingerlanneqassanersoq taamaalilluta tunngavissalersinnaavarput..

Tamanna isumatusaartumik ingerlatsigu, nunallu allat qanoq iliortarnersut malillugit piumasaqaativut naleqqussarlugit, aatsitassat qaqutigoortut atorneqarnissaat piiarneqarnissaallu pineqartillugit.

Suliffeqarfiit
Sanaartornerup iluani tamakkiisumik suliaqartarneq innuttaasut annertuumik maluginialersimavaat.

Tamanna annertuallaamik atorneqartartoq NUSUKA-mi isumaqarpugut, suliffeqarfinnut mikisunut akunnattumillu angissusilinnut iluaqutaanngimmat.

Tamakkiisumik suliaqartarnermik atuineq suliassanut ikittuinnarnut imikkullu ittunut killilersimaarneqalermat taamaattumik nuannaarutigilluinnarparput.

Sanaartorneq sapinngisamik akikitsuussammat sanartornerlu sapinngisamik sukkanerpaamik ingerlanneqassammat tamakkiisumik sanaartornerup naalakkersuisunit atorumaneqarnera pissutaasut ilagaat.

Taamatulli pisoqanngilaq, sanaartugassat annertuallaat, soorlu inissianik 300-nik sanaartornermi najugaqarfinni suliffeqarfiit taamallaat marluk-pingasut peqataanissamut periarfissinneqarmata, tamatumunngalu atatillugu piffissaq atugassaq pillugu tatisineq pissutigalugu suliffeqarfiit sulisussanik avataaniit tikisitsinissamut annertuumik periarfissinneqarlutik – ineriartornerlu tamanna Kalaallit Nunaata aningaasarsiorneranut iluaqutaanngilaq.

Sulisut arfininngornikkut sapaatikkullu sulisinnaasut pineqartillugit aamma annertunerusumik piumasaqaateqartariaqarpugut.

Tamatuma tungaatigut suliffeqarfiit ilaasortavut unammillersinnaanngimmata akuersaarsinnaanngilarput, suliffeqarfinni sulisutta ilaquttatik eqqarsaatigisariaqarmatigit.

Suliariumannittussarsiuussisarnermi inuiaqatigiit aningaasarsiornerat pillugu naliliisarneq ukiumi nutaami taarsiullugu ilanngutsigu, tamatumunngalu atatillugu suliffeqarfiit qanoq amerlatigisunik ilinniatuuteqarnersut kiisalu suliffeqarfiit kikkunnit pigineqarnersut qimerloorlugit.

Suliassat suliassiissutigisarneranni, pingaartumik sanaartornermi, ataatsikkut annertuallaartillugit, tamanna suliffeqarfiit mikisut akunnattumillu angissusillit taamaatiinnartariaqalernerannik kinguneqassaaq, kiisalu suliffiit amerlasuut annaaneqassallutik.

Aalisarnermut inatsit
Aalisarnermut inatsisip naammassineqarnissaa pillugu aalisarnerup iluani annertuumik isumaqatigiinngittoqarpoq.

Upernaakkut ataatsimiinnermi inatsit akuersissutigineqartariaqartoq NUSUKA-mi isumaqarpugut. Inatsillu ima isikkulerneqassaaq, aalisartut maani najugallit pisariaqartitaat periarfissaallu sapinngisamik isiginiarneqassallutik.

Pisuussutitta uumassusillit sapinngisamik atorluarniarneqarnissaat aallartittariaqarparput, aalisakkallu sapinngisamik annertunerpaamik nunami maani tunisassiassatut piareersarneqartarnissaat isumagilerlugu.

Pisuussutinik uumassusilinnik annertunerusumik imminut pilersulernissaq ukiumi nutaami annertunerusumik pingaartittariaqarparput kiisalu sanaartornerup iluani. Tamanna nunatta aningaasarsiorneranut annertuumik iluaqutaassaaq.

Sanaartornerup iluani najugaqarfinni suliffeqarfiit suliaqarnissaat qularnaarneqartillugu, tamatumunngalu atatillugu ilinniartunik najugaqarfinnilu sulisunik annertunerusumik atuinissamik piumasaqaateqartoqartillugu, inuiaqatigiit aningaasarsiornerat annertunerpaamik qaffassarsinnaavarput.

Tamatumunnga atatillugu aalisarnerup iluani ilisimanerusariaqarparput aalisakkat kikkunnit akisunerusumik pisiariumaneqarnersut kiisalu suliffissanik amerlanernik pilersitsilluta. Aalisakkallu pisassiissutit aalisartunut naleqarnersut maluginiarnerullugu.

Pisatik sapinngisamik annertunerpaamik aningaasatigut pissarsissutaanissaat piumasaqaatigisariaqarmassuk.

Nunatsinni ineriartornermut kalaallit inuiaqatigiit akuusutut misigisimalernissaannut 2011 aqqutissiuussisuussasoq neriuutigaarput – isiginnaartuinnartutut misigisimanermut taarsiullug. Sulisut avataanit tikisittát pisariaqanngitsut pillugit annertunerusumik piumasaqaateqartariaqarpugut, nukissavut annertunerpaat – sulisut – sapinngisamik annertunerpaamik atorneqarsinnaaqqullugit.

Ukioq nutaaq nunatsinni innuttaasunut atugarissaarfiussasoq iluanaarnartuussasorlu taamaalilluta neriuutigaarput.