Hashimik atornerluineq akiorniarlugu tv-kut paasisitsiniaaneq
Kalaallit Nunaanni hashimik atornerluineq akiorniarlugu iliuuseqarnermi pilersaarutip ilaatut TV-kut takutitassiaaqqat arfineq-marluk KNR-TV-kut aamma Nuuk TV-kut takutinneqassapput. Takutitassiaaraq siulleq ullumi januaarip 24-ianni takutinneqassaaq.
Paasisitsiniaanermi anguniagaavoq hashi aanngajaarniutillu allat pillugit oqallinnermik pilersitsinissaq, taamaasillunilu pinerlitsaaliilluni sulinermik nukittorsaaqataassalluni, namminersorlutik oqartussanit tusagassiorfinnut nalunaarummi allssimavoq.
Angajoqqaat inersimasullu allat meeqqanut inuusuttunullu maligassiuisuupput, paasisitsiniaanikkullu angajoqqaat atortussaqartinneqalissapput aanngajaarniutinik atuineq ppillugu qitornaminnik oqaloqatiginninnissaannut.
TV-kut takutitassiaaqqanik arfineq-marlunnik ingerlatsisuuvoq 15-inik ukiulik Ivâna. Taanna niviarsiaavoq pikkorissoq timersortartoq, kakkannerni assammik arsartarluni volleyballertarlunilu. Ivâna akuttunngitsumik hashimik takutinneqartarsimavoq ikinngutiminit, ilisarisimasaminit inuiaqatigiinnillu. Tamanna tupigusuutigaa namminerlu oqaatsiminik oqaatigalugu paasisitsiniaanikkut tassuuna tamanna misissorniarlugu. Taamaasiorpoq inunnik arlalinnik apersuinermigut, neriunarporlu tamakkua Ivânamik isiginnaartartunillu paasisaqartitsissasut.
Takutitassiaaqqat tamarmik naggaserneqartassapput Ivânap misigisaminik tamatuminngalu ilisimasanik nutaanik oqaluttuarneranik. Takutitassiaaqqat arfineq-marluk KNR-TV-p innuttaasutut paasissutissiinerani aallakaatinneqartassapput Nuuk TV-milu Nutaarsiassat aallakaatinneqarnerisa kinguninngua takutinneqartassallutik.
Paasisitsiniaanermik Paarisap suliaanik Imigassamut Ikiaroornartunulu Rådi suliarinneqataasimavoq. Aallakaatitassianut atatillugu innuttaasut Paarisamut itisiliisunik apeqquteqarsinnaapput una aaqutigalugu paarisa@nanoq.gl
Takutitassiaaqqat arfineq-marluk Paarisap qullerneranut nittartakkamut www.paarisa.gl ataavartumik ilineqartassapput
Makkua qulequtarineqarput:
Takutitassiaaraq 1: Hashi Atuarfillu
Takutitassiaaraq 2: Hashi Kalaallit Nunaallu
Takutitassiaaraq 3: Hashi ilaqutariillu
Takutitassiaaraq 4: Hashi inuunerlu
Takutitassiaaraq 5: Hashi siunissarlu
Takutitassiaaraq 6: Hashi peqqissuunerlu
Takutitassiaaraq 7: Hashi – toqqagaq ajortoq!
Kalaallit Nunaanni hashimik atornerluineq qiimmassaatinik allanik atornerluinermut ataqatigiissillugu takuneqarlunilu nalilerneqassaaq, tassa inuit amerlanerpaat hashimik ajornartorsiutillit, sivisuumik tupamik imigassamillu atornerluisuusarmata. Misissuinerit takutissimavaat meeqqat inuusuttullu aamma hashitortartut. Meeqqanik inuusuttunillu isumaginniffiit tarnillu pissusianik suliniutillit oqaatigaat gruppinik inuusuttoqartoq hashimik atornerluisorujussuarnik. Atornerluineq tamanna inuusuttut katsorsarneqarnerannut, ulluinnaannut siunissaannullu kinguneqaateqarsinnaavoq.