Atuarfinnit 30-nit atuartut 2303-t Afrikamik ikiuiniarlutik arpapput

Kalaallit atuartut kusanartumik nalissaqanngitsumillu angusipput, Kim Godtfredsen oqarpoq

Nunami tamarmi tallimanngormat Afrikamut ikiuiniarluni arpannermi peqataapput, ilaanni 20 gradinik issittumi. Una siusinnerusukkut Nuummi atuartut arpannerannit. Ass: Leiff Josefsen

Afrikamik ikiuiniarlutik kalaallit atuartut meeqqerivimmiittullu 9.601 kilometerinut pisupput arpallutillu.Taamaasilluni Danmarkimi nuna tamakkerlugu katersuiniarnersuarmi 29. Januar 2011-mi kalaallit meerartaat 9.601 koruuninik tunisipput, Kim Godtfredsen tusagassiorfinnut nalunaarummi allappoq.

Atuartut meeqqallu 2303-t atuarfinnit 30-ineersut peqataapput tallimanngormallu ullaap tungaanut Afrikamik ikiuiniarnersuarmi peqataasut agguaqatigiissillugu 4,52 kilometerit ingerlavaat.

Naatsorsuutigisamit annertunerujussuuvoq, nunaqarfinni illoqarfinnilu assigiinngitsuni sumiiffiit ilaanni 20 gradit sinnerlugit issittarsimammat.

Qanoq ilinerani ingerlanneqarnera sivikitsumillu piareersarfissaqarneq eqqarsaatigalugit kalaallit meerartaasa ilinniartitsisuisalu pikkorissut takuteqqippaat Afrikami ikiuinermut siunertamut pitsaasumut ikiuussinnaalluarlutik ikiuiniaqatigiiffiit assigiinngitsut aqqutigalugit.

Akunnerit marlorpiaat ingerlaneranni ilaat arpallluartorujussuupput, Kalaallit Nunaannilu atuarfiit pingasut annertunerpaamik katersuisut annertunerpaamillu agguaqatigiissillugu angusisut ataani allassimapput. Ajoraluartumik tamatumuuna atuarfiit tamarmik peqataanngillat, Atuarfimmilu Timersornerup qularutiginngilaa suliniut tamanna kusanartoq Afrikamillu ikiuiniarluni kilometerimutataatsimut 1 kr.-imik tunisinermik najoqqutalik meeqqat aalatinneqarnerannik isumassarsiatsialaasoq.

Katersuiniarlutik kilometerinik amerlanerpaanik angusallit pingasut:

Illoqarfiup-Nunaqarfiup atuarfia Atuartut amerl. Kilometerit Agguaqatigiissillugu

Maniitsoq Kilaaseeqqap Atuarfia 388 2050 5,28 km

Tasiilaq Tasiilami Alivarpi 449 1383 3,08 km

Sisimiut Minngortuunguup Atuarfik 267 1117 4,18 km

Agguaqatigiissillugu angusarissaarnerpaat pingasut:

Illoqarfiup-Nunaqarfiup Atuarfia Atuartut amerl. Kilometerit Agguaqatigiissillugu

Akunnaaq Aadap Atuarfia 14 152 10,86 km

Narsarsuaq Atuarfik Napaartoq 12 120 10,00 km

Nuuk Kangillinnguit Atuarfiat 41 307 7,49 km

Nunaqarfiit aaqqissuussinermik aallartitsinermut peqataanermullu pikkorissorujussuupput. Qeqertarsuullu Tunuami Aasiaat eqqaanni Akunnaaq atuartumut ataatsimut agguaqatigiissillugu angusarissaarnersaavoq, tasssa 10,86 kilometerinik, Maniitsumi amerlanerpaat katersorneqarsimallutik tassa 2050 koruunit, Kim Godtfredsen Atuarfimmi Timersornermeersoq paasissutissiivoq.

LEGO Fonden atuartut kilometerinut angusaannut aningaasaliisuuvoq. Agguaqatigiissillugu kilometerit tallimat ingerlaarsimagunik kalaallit qallunaallu meerartaasa 3,5t millioner koruunit Afrikamut katersorsinnaavaat! Aningaasat katersorneqartut Danmarks Indsamling-imut tunniunneqassapput, januaarip 29-ianni 2011 DR 1-imi nal. 19.00-miit toqqaannartumik aliikkusersuinermi. Toqqaannartumik aliikkusersuineq aamma KNR-tV-kut toqqaannartumik aallakaatinneqassaaq arfininngornermi nal. 15:00-miit.

- Atuarfimmi Timersornerup angusaq tamanna nuannaarutigisorujussuuvaa, Kim Godtfredsen oqarpoq meerarpassuillu qamannga pisumik qutsavigalugit.

Powered by Labrador CMS