Nannut kitaatalu avannaani piniartut ilisimasaat pillugit atuagaq nutaaq

Atuagaq tuluttut saqqummerpoq ateqarluni Polar Bears in Northwest Greenland

Kitaata avannaani nannunniarneq pillugu atuagaq tuluttut saqqummersinneqarpoq.

Kitaata avannaani nannunniarneq pillugu Pinngortitaleriffiup apersuilluni misissuineradta inernera maanna tuluttuunngorlugu saqqummersinneqarpoq. Angusat siusinnerusukkut kalaallisut qallunaatullu saqqummersinneqarsimapput (www.natur.gl), kalaallilli nannunniarnerat Canadami Alaskamilu issittumilu sumiiffinni allani soqutigineqaqimmat atuagaq maanna tuluttut saqqummersinneqarpoq.

Atuagaq tunngaveqarpoq 2006-imi kitaata avannaani nannunniartartunik misilittagalinnik 72-inik apersueqqissaarnermik, peqqissaartumillu allaaserineqarput 1952-imiit 2005-imut nannunniartartut nannunik 588-inik pisaqarsimanerat. Misissuineq aallartinneqarpoq pissutigalugu pisatut kisitsisitigut takussutissat tikkuussimmata kitaata avannaani nannunniarneq 1990-ikkut aallartinneranniilli annertusisimasoq. Allanngorneq tamanna pivoq silap pissusiata annertuumik allanngornera kitaatalu avannaani immap sikuata milleriarnera ilutigalugu. Nannunniartartunit paasissutissat nannunniarnermik, nannut sananeqaataannik, silap pissusiata allanngoriartorneranik allanngornerillu tamakkua nannunut tamakkualu piniarnerannut sunniutai iternga tikillugu nalissaqanngitsumillu oqaluttuarineqarput.

Misissuineq ingerlanneqarsimavoq Pinngortitaleriffimmit, Inuit Circumpolar Council (ICC) aamma Aalisarnermut, Piniarnermut Nunalerinermullu Naalakkersuisoqarfik suleqatigalugit.

Atuakkiortuupput Erik W. Born (Nuummi Pinngortitaleriffimmi Seniorforsker), Anna Heilmann (Nuummi Pinngortitaleriffimmi avataanit siunnersorti), Lene Kielsen Holm (Dirictor of International Sustainable Development, ICC, Nuuk) aamma Kristin L. Laidre (Pinngortitaleriffimmi ilisimatooq).

Atuagaq taaguutilik "Polar Bears in Northwest Greenland; an interview survey about the catch and the climate", naqiterisitsivimmit Museum Tusculanums-imit saqqummersinneqarpoq quppernermilu nittartakkami uani inniminnerneqarsinnaalluni (http://www.mtp.dk). Atuagaq 232-inik qupperneqarpoq assilersorneqarluarsimalluni.

Powered by Labrador CMS