Air Greenland: Ilaasut taarsiiffigitittussaatitaanngillat

Air Greenlandip Travel People Magazinep allaaserisaani isummerneq isumaqatiginngilaa, tassani allassimammat ilaasut Danmarkimeersut 400 euronik taarsiiffigitittussaasut.

Allaaserisami EU-mi peqqussut (EF) 261/04 innersuussutigineqarpoq. Air Greenland nalunaarpoq peqqussut taanna Islandimit aamma Danmarkimit angalanernut atuuttoq, allaaserisami eqqaaneqartutut Danmarkimiinnaanngitsoq. Aqqutip illuatungaanut atuutinngilaq.

Ilumuunngilaq

Allaaserisami oqaaseq "ilumoortoq" atorneqarpoq, tassalu suliffeqarfik taarsiinngitsuussaguni aallarfissatut pilersaarut taamaatinneqarpat ullunik arfineq marlunnik sioqqutsisumik ilaasut kalerrinneqassasut.

- Tamanna ilumuunngilaq, ilumoortoq tassa ullunik 14-inik piffissaliineq! Ullunik arfineq marlunnik piffissaliineq periarfissat pingasuusut ilagaat, Air Greenlandimi inatsisilerinermut pisortaq Christian Keldsen allappoq, piumasaqaatillu arlallit ilisimatitsissutigalugit:

"Aallaavittut timmisartumik aallarnissaq aningaasarsiorneq peqqutigalugu taamaatinneqarpat taarsiisoqassaaq, ilaasullu aallarfissaq sioqqullugu kingusinnerpaamik ullut 14-it sioqqullugit ilisimatinneqarsimanngippata; imaluunniit

1) aallarfissaq sioqqullugu ilaasoq ullut 7-it aamma 14-it akornanni sioqqutsisumik ilisimatinneqarpat, aallarfissatullu pilersaarut akunnerit marluk iluanni allamut inniminniisoqarsinnaappat, tikiffissatullu pilersaarut sioqqullugu akunnerit 4-t iluanni; imaluunniit

2) aallarfissaq sioqqullugu kingusinnerpaamik ullut 7-it, allatut angalasinnaaneq aallarfissatut pilersaarut sioqqullugu akunnerup ataatsip iluani qularnaarneqarsinnaappat, tikiffissatullu pilersaarut sioqqullugu akunnerit 2-t iluanni tikinnissaq".

Air Greenlandimit Christian Kjeldsen aamma allappoq:

- Danmarkimmeeraanni timmisartuutileqatigiinnut allanut imminiisitsineqarsinnaanngilaq. Taama periarfissaqarpoq Islandimit, ajoraluartumilli qulaani taaneqartutut piffissatigut periarfissat iluini pisinnaanani,, tak. imm. 2. Keflavikimit Nuummut ilaasut allamut ilaatinneqarput, peqqussullu malillugu 250 euronik taarsiiffigitinneqarlutik. Taarsiinerup amerlalassusianut apeqqutaavoq illoqarfiit akornanni isorartussutsit, tassalu Københavnimit 400 euro, Keflavikimiillu 250 euro. Taaneqareersutut Islandimit ilaasut akiliiffigaagut, Air Iceland atorlugu Keflavikimit aallarfissatut pilersaarut sioqqullugu akunnerup ataatsip illuani aallarnissaq qularnaarneqarsinnaanngimmat, Nuummullu tikiffissatut pilersaarut akunnernnik marlunnik sioqqullugu, ilisimatitsivoq.

Sapinngisatsinnik iliorpugut

Christian Keldsenip "pisut imaannaanngitsut" pillugit allappoq:

- Peqqussutip imm. 14-iani suliumajunnaarnerit pinngitsoortitsisinnaasutut toqqaannartumik taaneqarsimapput. Tassani suliffinni aaqqiagiinnginnerit suulluunniit ilaapput.

- Pisulli imaannaanngitsut atuutilersinnaapput, pinngitsoortitsisinnaaneq pillugu aalajangersagaq malillugu timmisartuutileqatigiit aalajangiissallutik pisussaasut, issuaaneq "sillimaffiusinnaasuut suulluunniit naammaginartumik aalajangiiffigineqarsinnaasut, assersuutigalugu aaqqiagiinngissutit peqqutigalugit kinguaattoornissat/ttamaatitsiinnarnissat pinngitsoortinniarlugit, allappoq.

- Tassani ilaapput allanut inniminniinissat aamma/imaluunniit attartornissat. Københavnimit allanut inniminniinissat tupinnanngitsumik periarfissaqanngillat, allanik timmisartuussisoqanngimmat, aamma Island aqqusaarlugu.Attartornissaq eqqarsaatigalugu timmisartuutileqatigiit qulinik sinneqartut toqqaannartumik attaveqarfigaagut, amerlanerillu suleqatigut aqqutigalugit. Arlaalluunniit timmisartuussisinnaanngilaq - ilaatigut sulisut aaqqiagiinnginnermi illersuimmata, timmisartussaqannginnamik imaluunniit Kalaallit Nunaannut timmisartuussinissaq piginnaasaqarfiginnginnamikku (ilisimaneqartutut timmisartuussisunut arlalissuarnik killilersuuteqarmat). Tamakku saniatigut 3F aamma Dansk Metal illersuipput, taamaalilluni timmisartumik nassaarsimagaluaruttaluunniit danskit mittarfiini sullinneqarsinnaasimassanata, orsussamik pisisinnaassanata il.il. Tamakku saniatigut Kalaallit Nunaanni mittarfiit naanneri ajornartorsiutaapput, aammalumi Sermitsiaq.AG Air Icelandimit FIA'p illersuinera pillugu allaaserisaqarpoq, Christian Keldsen oqarpoq erseqqissaallunilu:

- Taamaammat iliuusissat naammaginartut aalajangiiffigisimavagut inatsisillu malissimallugit allatullu iliuuseqarluta

Eqqartuussivimmi misiliineqarsinnaavoq

- Kina allaaserisaqarsimanersoq uppernarsisimanngilara (apersuigaluarlunga), Trafikstyrelsen/Statens Luftfartsvæsen (SLV) ilumut oqaloqatigisimanerai. Arlaannut attuumassuteqanngitsup taarsiissuteqarnissaq nalilersorsinnaavaa, pisulli imaannaanngitsut pillugit isummertoqarsinnaassagunarani. Inatsisit malillugit suliumajunnaarneq/aaqiagiinnginneq pinngortitamit peqquteqarsinnaanngillat, imm. 14-imili taanenqartoq peqqutigalugu peqqussummi ingerlaqqilaartoqarsinnaavoq. Tamakku saniatigut pissutsit aaqqiagiinnginnerup kingunerisai imaannaanngitsuusinnaapput. Peqqussutip eqquutsinnera SLV'p puigorpaa, aalajangiineralli inatsisitigut kimeqanngilaq, taamaammallu eqqartuussivimmi misiliinissaq pisariaqarlersinnaavoq, Christian Keldsen naliliivoq nangillunilu:

- Eqqartorneqareersutut inunnik ikiuinisssaq qulakkersimavarput (nerisaqartitsineq unnuisitsinerlu) kiisalu ilaasut Kalaallit Nunaanni uniinnarsimasut pillugit peqqussut atorsimavarput, naak tamanna pisussaaffiginngikkaluarlutigu. Aningaasartuutinut tamakkununnga ukiumut 18,5 millioner kr. missaat atortarpagut, ilisimatitsivoq.

- Peqqussummi "uggornartoq" ajoraluartumik tassaavoq, Europami sumi tamaani ilaasut isumalluartinneqartarmata qaqutigorluinnaq piviusunngortinneqarsinnaasunik. Peqqussutip 2005-imi atuutilerneranit maalaarutit Air Greenlandimut ingerlatinneqartartunit ataasiarlutaluunniit akiliinissatsinnik piumaffigineqarsimanngilagut. Isumaga malillugu tamatumunnga uppernarsaataavoq peqqussutip atuisartunik paatsoortitsisarneranut peqqutaasoq, Christian Keldsen erseqqissaavoq.