Dronningip nalliuttorsiornermi peqataanera 270.000 koruuneqarpoq

Dronninngip 2009-mi Nuummukarnera Naalagaaffiup karsianut akisoorujussuuvoq.

Namminersorlutik Oqartussat eqqunneqarnerata nalliussineqarnerani kunngikkormiut peqataanerat millionip kuartianik akeqarsimavoq. Tamatuma saniatigut assartornerannut aningaasartuuteqarpoq. Ass.: Jørgen Chemnitz

ippassaq marlunngornermi tusagassiortunik katersortitsinermi ministeriunerup Lars Løkke Rasmussenip Kunngikkormiunut ingerlatsinermut aningaasartuutinut ukiumoortumik nalunaarusiaq siulleq saqqummiuppaa. Nalunaarusiami takuneqarsinnaavoq 2009-mi juunimi, Namminersorlutik Oqartussat eqqunneqarnerata nalliuttorsiutigineqarnerani, Kalaallit Nunaannut angalaneq Naalagaaffiup karsiata 270.000 koruuninik aningaasartuutigisimagaa. Kalaallit Nunaanni Naalagaaffiup sinniisuata Søren Hald Møllerip aningaasartuutit amerlassusaat Statsministereqarfimmut ingerlateqqissimavai:

- 2009-mi juunimi Dronningi pisortatigoortumik Kalaallit Nunaannut tikeraarpoq. Kalaallit Nunaanni Naalagaaffiup sinniisuata tikeraarnermi aningaasartuutit 270.000 koruunit missaannut naatsorsorsimavai, Statsministeriaqarfimmit nalunaarusiami allassimavoq.

Dronningip saniatigut uia Prinsgemalen, Kunngissaq Kunngissallu nulia 2009-mi Namminersorlutik Oqartussat eqqunneqarnerat Nuummi nalliuttorsioqatigaat. Tamatumani Kunngissakkut aamma nunaqarfimmut inuerussimasumut Qoornumut ulloq ataaseq angalappu. Tamanna peqatigalugu Dronningi uialu nalliuttorsiornerit kingorna Air Greenlandip timmisartuanik Tasiilamukarput, tassani aamma sakkutuut timmisartortartut timmisartuat peqataalluni.

Illersornissamut ministereqarfik nalunaarusiamini allappoq 2009-mi kunngikkormiut timmisartumik angallanerat 3,2 millioner koruunit missaannik akeqarsimasoq. Kunngillu umiarsuaa 46-nik inuttalik 2009-mi Naalagaaffiup karsianut 33,7 millioner koruuninik akeqarsimasoq. Kisitsisit kingulliit marluk ukioq naallugu kunngikkunnik assartuinermut atorneqarsimapput aaqqissuussinernut, tamakkunani kunngikkormiut pisortatigooretumik nunanut allanut, Kalaallit Nunaannut Savalimmiunullu tikeraartarlutik Danmarki sinnerlugu.

2009-mi Kunngikkormiut Naalagaaffiup karsiata 342 millioner koruuninik aningaasartuutigisimavai.

Powered by Labrador CMS