Umimmak qangarsuarnisaavoq

Umimmak, natersuartut pisoqqatut isikkoqarnerusoq, nersussuaanngilaq puffaluujunanilu, savaasat savallu ilaqutarinerullugit - sananeqaatit eqqarsaatigalugit uumaniallaqqissoq.

Uumasunik ilisimatuunit ilisimatusartunillu soqutigineqarpoq, ukiut ingerlanerini silap allanngortarnerinut naleqqussarsinnaasarsimagami, miluumasut nunamiut allat assiginagit, ukiut 10.000-it missaasa matuma siorna ukiuni sermersuaqarfiusuni kingullerni nungutaasut.

Qanoq ililluni uumaniaannartarsimanersoq paaserusuppaat, uumasullu nunamiut miluumasut nungutaajartulersut qanoq iliuuseqarfigineqarsinnaanersut pillugu.

Umimmaat uumaffigisaanni misissuinermi inerniugallartut Dr. Berger-imit oqaluttuarineqarput, sapaatip akunnerani kingullermi USA-mi Bronx Zoo-mi tamanut saqqummiussinermi. Umimmannik tigusarinnittarnermi katersorneqarsimapput, uuttortaanermi oqimaassusersiuinermilu, kigutaasa aavatalu misissorneqarneranni, aammalu siunissami sumiinnerannik paasiniaasarnissami GPS-inik atortulerneqarsimallutik.

Alaskami umimmaat kigutiluttorujussuusut ilaatigut oqaluttuaraa, napisarsimasunik kigutillit, tamannalu ilisimatusartunit paasiuminaatsinneqarpoq:

- Pepsi-mi aamma Snickers Bar-imi soorlu sanigorsersimasut, Dr. Berger oqarpoq, umimmaalli Bering-ip eqqaaniittut kusanarluinnartunik kiguteqartut oqaluttuarisinnaallugu.

Umimmaat meqqui immikkut illuinnartuupput, tuttut assiginagit, aaasaq naallugu angajuartariaqartartut niviukkat ippernallu qimarratigalugit, umimmaalli ippernarpassuarnit najorneqartarput, meqquminnilli natersuatoqqamut eqqaanarnerusunit illersormeqarluartarlutik.

Meqqui saniatigut illersuuteqarput, qiviunik, meqqunit kissaarnerusunit aammalu cashmere-nit maagaarnerusunit.

Ukiuuneranilu tunngaviusumik manna pissuserisarpaat:

- Uninngaqqissaarneq. Nunamut ilassuuttorujussuullutik. Toquusartutut pissuseqartarput, aammalu iltimik atuinertik timillu inuussutissanik suliarinnittarnera pingajorarterummik annikillisittarlugu. soorlu maskiinat unitsinneqartut, Dr. Lawler umimmannik misissuisimasoq oqarpoq.

- Ilaqutariittut ataqatigiilluinnartutut uumasuupput, Dr. Berger oqarpoq, kikkullu kinaanersut nakkutigeqqissaartarpaat. Uumasunik kiiisortunik soorlu amaqqunik naammattoorsigaangamik iloqqasunngorlutik inissitsitsitertarput, inersimasut saarlinngorlutik nassutik qarmakkatut atortarlugit, iloqqasup iluani piaqqat illersorneqartarlutik. Aamma eqqaamallaqqissorujussuugunarput, aputaaraangat neriniarfigisartakkatik pitsaanerit eqqaamasinnaasaramikkit.

Oqaluttuarisaanermi allattugaatit takutippaat umimmak piffissamit Kvartær-imit pisuusoq. Piffissap ilaani ikilisarsimapput, kingusinnerusukkuli amerleriaqqittarlutik.

Umimmaat 100.000-it missaat Canadami, Alaskami, Kalaallit Nunaanni aamma Sibiriami siammarsimasut isumaqartoqarpoq, ilisimatusarnerullu takutippaa umimmaat siunissami ukiorpassuarni suli uumasuujumaartut:

Umimmaat nungukkiartortut oqaatigissallugu ajornakusoorpoq. Kisiannili uumasuupput nukittorujussuit.

Tamanna New York Times-imi allaaserineqarpoq.