Meeqqerivinniittuuteqarneq pissakitsunut akikinnerulissaaq
Ilaqutariit ukiumut 150.000 koruuniniit ikinnerusunik isertitaqartarunik Kommuneqarfik Sermersuumi akiliinatik meeqqerivimmiittuuteqarsinnaapput. Ilaqutariit allat tassunga akiliinerusalissapput.
Kommunalbestyrelsip aamma aalajangiuppaa ulluunerani paaqqinnittarfinnut aamma dagplejemiititaqarnermut ilaqutariit isertitakinnerpaat akiliutigisartagaat appartinneqassasut.
Kommuneqarfik Sermersuumi ilaqutariinnut ukiumut 150.000 koruuninit ikinnerusunik isertitaqartartunut paaqqinnittarfimmiititaqarneq akeqassanngilaq. Tamanna killigititaq 99.999 koruuniniit 149.999 koruuninut qaffanneqarpoq maannakkut akiusumut siornatigut kommuniusimasumi illoqarfinni nunaqarfinnilu assigiinngitsuni akiliutigineqartartumut sanilliullugu.
laqutariit allat tassunga akiliinerusalissapput.
Isertitaqaqqortussusillit siulliit angajoqqaat ukiumut 175.000 koruunit ataallugit isertitaqartartut akiliutigisartagassaat procentinik arfinilinnik qaffanneqarneraniit ilaqutariit ukiumut 800.000 koruuninik amerlanerusunilluunniit isertitaqartartut akiliutigisartagassaat 45 procentinut qaffanneqarpoq, Kommuneqarfik Sermersooq nalunaarpoq.
Ilaqutariit akiliutigisartagassaat isertitaqaqqortussutsinut 20-nut agguataarneqarpoq, procentit arfinilinniit procentimik ataatsimik qaffakkiartoruusaartinneqarluni 45 procentit tungaannut
Isertitat 25.000 koruuninik amerlaneruleraangata akiliutigineqartartoq qaffariaateqartinneqartarluni. 500.000 koruunit qaangerlugit isertitaqaraanni qaffariaat procentiusoq qaffariaateqarneruvoq ikinnerusunik isertitaqartartunut sanilliullugu. Ilaqutariit Nuummiut ukiumut 600.000 koruuninik isertitaqartartut meeqqaminnik meeqqerivimmiititaqarnerminni januaarimiit qaammammut akiliutigisaligassaat 1400 koruuniussapput maannamut 1060 koruuniusaraluartoq.
Kommuneqarfik Sermersuumi ilaqutariinnut meerartalinnut paaqqinninnissamut neqeroorutinut akit tulluarsarneqarnissaat 2011-mi atuutilissaaq. Soorlu tamatuma kinguneranik Illoqqortoormiuni aamma Nuummi ilaqutariit assigiimmik isertitaqqortussuseqartut meeqqamik meeqqerivimmiitinneranut, meeraaqqerivimmiitinneranut, fritidshjemmimiitinneranut imaluunniit kommunip suliffiutaani ulluunerani paaqqinnittarfimmiitinneranut assigiimmik akiliuteqartalissapput.
Siornatigut kommuneusimasumi illoqarfinni tallimaasuni nunaqarfinnilu arfineq pingasuusuni paaqqinnittarfinnut akit assigiinngitsorpassuusarsimagaluarput.