Napparsimasut Angerlarsimaffiata inissaaleqineq aaqqiivigissavaa
Napparsimasut Danmark-imi katsorsartittussat ukioq ataaseq qaangiuppat pitsaanerusunik najugaqarfeqalissapput
Napparsimasut Angerlarsimaffissaata nutaap Rigshospitalimit pisuinnarmik orninneqarsinnaasup illoqannginnersanullu qanittumiittup sananeqarnissaa ukiortaaq nallertinnagu aallartinneqassaaq.
Napparsimasut Angerlarsimaffiat 2012-ip aallartinnerani iserterfigineqarnissaminut piariissaaq. Taamaalilluni qangali kissaatigisimasaq naammassineqassaaq, napparsimasut Danmark-imi katsorsartittut Danmark-imi najugaqarnerminni pitsaanerusunik atugaaarnissaannik.
- Napparsimasut ineqarfimmi illoqarfiup qeqqaniittumi ullutsinnut naleqquttumi najugaqarfissaannik qanittukkut neqeroorfigisalersinnaassagatsigit assut nuannerpoq. Annertuumik nappaateqarsimagaanni nukissaajarnartumillu katsorsartissimagaanni matu matullugu nammineersinnaaneq pissusissamisuuinnassaaq, ineqatigisaq ilisarisimanngisaq eqqarsaatiginagu, peqqinnissamut naalakkersuisoq Agathe Fontaine tusagassiutinut nalunaarummi allappoq.
Brønshøj-imi maannakkut Napparsimasut Angerlarsimaffiat ukiuni kingullerni marlussunni assut inissaaleqiffiusarsimavoq, napparsimasullu kisimiillutik ineqarnissaannik neqeroorfigineqarnissaat amerlanertigut periarfissaasarsimanani. Brønshøj-imi Napparsimasut Angerlarsimaffiat 45-nik siniffeqarpoq, saniatigut 13-inut siniffiliornissamut periarfissaqarluni.
Napparsimasut Angerlarsimaffiat nutaaq ataasiuttakkanik 53-inik initaqassaaq, nammineq perusuersartarfilinnik uffarfilinnillu, ilaaquttallu unnueqataanissamut periarfissinneqassapput. Immikkoortinneqartussanullu ineqarfeqassaaq, pingaartumik kræftimik nappaatilinnut. Fælledparken-ip eqqaani Napparsimasut Angerlarsimaffiat sananeqassaaq, pisuinnaq Rigshospitalimiit minutisnik qulinik ungasitsigisumi.
Napparsimasut Angerlarsimaffissaannik nammineq sananissamut taarsiullugu illumik sivisuumik attartorneqarsinnaasumik peqqinnissaqarfik isumaqatigiissuteqarsimavoq. Brønshøj-imi Napparsimasut Angerlarsimaffiat tunineqassaaq, angerlarsimaffik nutaaq iserterfigineqarnissaminut piareerpatr.
Kalaallit Napparsimasut Angerlarsimaffiat Drooning Ingridip Napparsimmavissuanut atavoq, tassanilu napparsimasut najugaqarnissaminnik unnuisarnissaminnillu neqeroorfigineqartarput, Danmark-imi katsorsartittut. Napparsimasullu Angerlarsimaffiata napparsimasut Danmark-imi najugaqarneranni siunnersorneqartarnerat ikiorneqarneqartarnerallu aamma isumagisassaraa.