Nannuttassat marloriaatinngornissaanik piumasaqarput
Tunumi nanut amerlassusaata kisinnissaat tuaviortumik pisariaqarpoq, taavalu nannuttassat amerlillugit, IA-miit Harald Bianco oqarpoq.
Aappaagu Tasiilap eqqaani 20-nik nannuttassiisoqarpoq. Pisarnertut ingerlasoqassappat qaammatialuit qaangiutiinnartut nungoreersimassapput.
Taamaattumik Tiniteqilaami piniartut peqatigiffiata qinnutigisarsimavaa nannuttassat 30-nngortinneqarnissaat.
Inatsisartunut ilaasortap Harald Biancop Inuit Ataqatigiinnersup piniartut kissataa paasilluarsinnaavaa. § 36 naapertorlugu apeqqummi oqaatigaa nunatsinni sumiiffinni allanisuut Tasiilami piniartut malugisimagaat nannut amerliartuinnartut.
Isumaqarpoq nannut kisinneqarnissaat pissusissamisoortoq. Kingornalu Tasiilap eqqaani 2011-mut nannuttassat 40-nut amerlineqarlutik.
- Paasivara Pinngortitaleriffimmi kitaani nannunik kisitsiniartoq, naak kisitsisoqartareeraluartoq, aatsaallu 2012-mi Tunumi kisitsisoqassalluni. Kitaani kisitsisoqareersoq nalungninnakkut tulleriiaarineq kukkusoraara. Tunummiuusugut qangalili nannuttassat amerlineqarnissaat kissaatigisarsimavarput, itigartinneqartarpugulli tunngavilersuutigineqartarmat kisinneqarsimanngimmata taamaalliortoqarsinnaanngitsoq. Paasisinnaanngilarput kisitsiffioreersuni kisitsinissaq salliutinneqarmat tamannami killormoorpoq, Harald Blanco tunngavilersuivoq.
isumaqarpoq paasiuminaatsoq Pinngortitaleriffiup nittartagaani allassimammat Tunumi nanoqassutsimik kisitsisaatoqartoqanngitsoq allassimallunili ukiuni 30-ni kingullerni immap sikuata peerukkiartornerani nannut ikileriarujussuarsimasut.
- Soorunami tamann eqqoriaaneruvoq kisitsisoqarsimanngimmat. Tamassuma takutippaa kisitsinissaq pisariaqartoq, Harald Blanco oqarpoq.