Ilaqutariit meerartallit juullimi pissaaleqipput
Juullimut aningaasanik ikiorserneqarnissamik pisariaqartitsineq allanngorsimanngilaq, Nuummi Kalaallit Røde Korsiat oqarpoq.
Marlunngormat decembarip 15-ianni Kalaallit Røde Korsiata Nuummi Immikkoortoqarfia gavekortit katillugit 154.000 koruuninik aningaasartallit Nuummi ilaqutariinnut meerartalinnut 80-inu juullimi ikiortariaqartunut agguaappai.
Juullimut aningaasanik ikiorserneqarnissamik pisariaqartitsisoqartorujussuusoq takuneqarsinnaavoq qinnuteqaaterpassuartigut, Nuummi immikkoortoqarfiup ukioq manna tigusimasaani.
Kalaallit Røde Korsiata Kalaallit Nunaanni immikkoortoqarfii ilaqutariinnut meerartalinnut illoqarfimminni juullimut aningaasanik ikiorsiisarput tamarmik immikkut ittumik. Illoqarfinni arlalinni julekurvinik tunisisoqartarpoq.
Juullimut ikiuutinut aningaasartuutit matussutissinneqartarput aningaasaliisunit aammalu atoriikkanik pisiniarfinni sinneqartoorutinit.