Nioqqutissanut assilisanut ingerlatsivik sorsulerpoq

Canada Goosep tunisassiai assilisat internettimi nunarsuaq tamakkerlugu attaveqaqatigiinnit internettikkut tuniniarneqarput.

Canadamiut kavaajaliaat nalunaarsortissimasoq assilillugu tuniniarneqarpoq. Ingerlatsiviup tuniniaasut akiornialerpai. Ass.: Pressefoto

Mutilit meqqiat Canada Goose nunarsuarmi kavaajat oqornersaasa ilagaat. Pilerigineqarnersaasalu ilagalugu. Ingerlatsivik nalunaarsortissimasuuvoq kavaajaliaatalu assileqarnera internettikkut tuniniarneqartarpoq, ilaatigut Kalaallit Nunaanni.

Kavaajaq assilisaq takuinnarlugu assilisaanersoq takujuminaappoq, misiliinikkulli paasineqarpoq kavaajat kukkukuuaqqat meqquinik il.il. oqorsaaserneqarsimasut. Kajaavat ilaasa sinaat qimmit amianik kaniinanilluunniit sanaajupput.

Taamatut tusagassiorfikkut nalunaaruteqarpoq Canada Goose.

- Sapaatit akunnerisa marlussuit matuma siornatigut quppernerit nittartakkat 20-30 akornanniittut Canada Goosenik originalinik tuniniaanerarput 1000 koruuniliinnarlugit. Tamanna pissutigalkugu Facebookimilu nuanniitsumik sammineqalermat Canada Goose qisuariartariaqarpoq.

Ingerlatsivik atisanik meqqilinnik illersuinermik sulialik imissimavarput quppernerit nittartakkat matoqqullugit internettikkut attavilersortui PayPal-kontuilu atorunnaarsillugit. Quppernerit nittartakkat tamakkua ilaat matuneqarsimapput, ullulli tamaasa nutaanik takkuttoqartarpoq.

Canada Goosenik ilumoortunik pisiffissatuaapput tamakkuninnga niuertutut nalunaarsortissimasut, Canadian Goose allappoq.

Nioqqutissianik assilisanik pisineq pillugu inatsimmi ima allassimasoqarpoq:

Nioqqutissiat assilisat pillugit nunani tamalaani ataatsimut malittarisassaqanngilaq. Nunat ataasiakkaat malittarisassaasigut aalajangerneqartarpoq tamanna inerteqqutaanersoq inerteqqutaannginnersorluunniit - nioqqutissallu suussusia akialu, ilaatigut aalajangiisuusarput nioqqutissat nunamut eqqunneqarsinnaanersut. Assersuutigalugu Frankrigimi Italiamilu nioqqutissat assilisat eqqunneqarnissaat inerteqqutaavoq.

Powered by Labrador CMS