Allakkerivik 650-inik sulisitsivoq atuaruminaatsunik atuartussanik

Allannerluttut allagaat allakkallu puussaanni juullimut pinnersaatit pillugit allakkerivik juullimi ikiorterpassuarnik sulisitsivoq.

Post Danmarkimi maskiinat adressinik atuaatit eletroniskiusut allannerit atuaruminaatsut sivingasumillu allannerit atuarsinnaanngilaat. Ass.: Finn Frandsen, Polfoto

Post Danmarkip scanneriisa angisuut adressivit atuarnissaa allakkallu immikkoortiternissai imaasiallaannaq atuarsinnaavai adressi allakkanut puussamiippat aningaaserivimmeersumit kommunimeersumilluunniit. Julekortilli atsameersut, aanaakkunneersut juullimullu pilluaqqusisunit allaneersut allaanerupput.

Inuit 650-t ulluni makkunani ikiortigineqarput, tassa maskiinat aanaaqqiip allanneri uingasut atuarsinnaanngimmagit. Kuultimillu allatat bordeauximik tunuliaquttallit. Aamma klistermærkit, qillaalasut juullisunnitsullu adressinik atuaruminaatsitsisinnaasut.

Taamatut allappoq Avisen.dk.

Allakkat apuuffissaminnukaassorneqassapput sapaatillu akunnerpassuunngitsut matuma siornatigut ilinniagaqartut suliffissaaleqisullu Post Danmarkip nettimi inuttassarsiuinera pilernguppaat taamaasilluni juullimi ikiortitut atorfiit minutsialunnguit ingerlanerinnaanni tamarmik inuttassarsineqarlutik.

Tamakkua ilarpassuit sulinissamut angusisut pinerlussimannginnermullu allagartamik takutitsisut decembarip 6-ianniit 23-iannut Københavns Postcenterimi unnukkut unnuakkullu sulisarput akunnermut 130 koruunit missaannik akissarsiaqarlutik.

Powered by Labrador CMS