Ilaqutariit 170-it kommunep allaffiani juullisiussapput
Nuummi atugarissaarnissamut ingerlatsivik ilaqutaariinnik pisortanit ikiorsiissutinik pisartalinnik pingasunngorpat 22. december ualikkut marlunut juullerpalaartitsissaaq, tassanilu tunissutinut allagartanik agguaasoqassaaq.
Ilaqutariit 170-it pisortanit ikiorsiissutinik pisartagallit Nuummi Kommuneqarfik Sermersuup allaffeqarfiani kommunalbestyrelsip ataatsimiittarfiani orpiliartinneqassapput.
Kommuneqarfik Sermersooq taama allappoq.
Orpiliarnermi ilaqutariit tamarmik tunissutinut allagartamik 500 koruuninik aningaasartalimmik tunineqassapput , aammalu meeqqamut ataatsimut juullimut tunissutisinissamut tunissutit allagartaannik 100 koruuninik aningaasartalimmik tunineqassallutik.
Kommuneqarfik Sermersooq illoqarfinni tamani aningaasanik atugassanngortitsinissamik aalajangersaasimavoq, ingerlatsiviit assigiinngitsut ilaqutariinnut pisortat ikiorsiissutaannik pisartagalinnut aaqqissuussisinnaaqqullugit. Kommunemi ingerlatsiviit ataasiakkaat ilaaqutariinnut pisortanit ikiorsiissutinik pisartagalinnut aningaasaliissuteqassapput.
Nuummi atugarissaarnissamut ingerlatsiviup aalajangiuppaa tunissutinut allagartanik tunissuteqartoqassasoq, ilaqutariillu juulisunnitsumik aaqqissuussiffigineqassasut, ilaatigullu aliikkusersuisuussapput Leif Immanuelsen aamma Hanne Saandvig. Aamma orpiliartoqassaaq, soorunalumi Juullip Inua takkutissaaq, mamakujuttunik meeqqanut agguaajartorluni.