Assagiarsunniarnerup killilersorneqarnera

Maniitsup Sisimiullu eqqaani assagiarsoqassuseq annertuumik tatineqarpoq.

Naalakkersuisut ullumi ataatsimiinnerminni aalajangerpaat ukioq mannamut naleqqiullugu 2011-mi kitaani assagiarsunniarneq killilersorniarlugu, taamaalilluni 2011-mi pisassaat tamakkiisut 1.930 tonsiulerlutik. Aalisarneqarnerat ukioq mannatut annertutigissasoq naatsorsuutigineqarpoq.

Sinerissap avataani EU 500 tonsinik pisaassaqarpoq. Tamanna EU-mik isumaqatigiissummut tunngavoq.

Biologit TAC-mut siunnersuutigaat nunatta kitaani 2.430 tonsiussasut, sinerissap avataani 1.130 tonsit qanittuanilu 1.300 tonsit. TAC tassaavoq total allowable catch, tassaalluni pisaassanik amerlassusersiineq. Innersuussineq Canadami biologit suleqatigalugit ingerlanneqarpoq, taakkumi ilaatigut New Foundlandimi assagiarsoqarneranik aqutsineq ilsimasaqarfigilluarpaat.

Biologit aamma innersuussutigaat sinerissap avataani Maniitsup Sisimiullu avataani assagiarsunniarneq unitsinneqassasoq. Tamanna malinneqarpoq takuneqarsinnaammat sumiiffinni taakkunani assagiarsoqassuseq annertuumik tatineqarsimasoq.

Biologit siunnersuutaanni sumiiffiit immikkoortiterneqasimapput, taamaalilluni annertunerusumik nakkutilliisoqarnissaanik innersuussineq malinneqarsimanani. Aamma siunnersuutigineqarsimavoq ukiup ingerlanerani assagiarsunnik mikisunik aalisarnerup killilersorneqartarnissaa taamaalilluni assagiarsuit aqitsumik qaleruaqarneranni aalisarneqarnatik.

Assagiarsunniarnermi nalunaarumi attuuttumi aalajangagersagaqareerpoq piumasarineqarluni aalisarneq unitsinneqartassasoq assagiarsuttat 20 procentii sinnerlugit aqitsunik qaleruaqartut. Tamaattumik naalakkersuisoqarfimmii innersuussutigineqanngilaq aalisarneqarnerisa nalaani allatigut killilersuinissaq.

Powered by Labrador CMS