Ilimanami umiarsualivik ilaginnarneqarpoq

Ilimanarmiut naatsorsuutigaat ukiumut takornariat 1.000-t missaanniittut annaasarlugit umiarsualiviup amigaateqarnera pissutigalugu. Tassami mallerluartillugu taliffigineqarsinnaanngilaq imaluunniit ulorianarpallaaqaaq, tassa takornariat umiarsualivimmi kanngussammik majuartarfikkut qummorluinnaartutigut majuartariaqarmata.

Kristian Jeremiassenip Siumumeersup Naalakkersuisunut tusarniarsimavaa taassuma iluarsaanneqarnissaa.

Taamaattoqanngilaq.

- Naluneqanngitsutut Kalaallit Nunaanni umiarsualiviit tamaviisaa aserfallatsaalinissaannut 18 millioner koruuninik immikkoortitsisoqarsimavoq. Aningaasat taakkua sapinngisamik pitsaanerpaamik atorniarneqassapput. Tassani pingaartinneqarnerupput pilersuinerup isumannaatsuunissaa ilaasunillu assartuineq, aningaasassaqassappalli takornarianut atortut aamma iluarsiniarneqassapput. Taamaasilluni Kangerlussuaq ukioq manna puttasumik talittarfittaarsimavoq, umiarsuarnik takornariartaatinik takornarianut iluaqutaasumik, angallannermut naalakkersuisoq Jens B. Frederiksen akivoq.

Taassuma ilanngullugu tikkuarpaa umiarsualiviit tamarmik 80 mio. kr.-nit missaannut iluarsaanneqarnissaminnut kinguaattooqqasut.