Kuannersuit unammillerteqalerpoq
Amerikarmiut aatsitassarsioqatigiiffiata pilersaarutigaa ukiut marluk qaangiuppata atortussiassanik qaqutigoortunik 20.000 tonsinik tunisassiortalernissani, taamalu Kinap atortussiassanik pilerigineqartunik siuttuunera aalassatsillugu.
Kuannersuarni aamma Kringlerne-mi atortussiassat qaqutigoortut ukiut marluk qaangiuppata immaqa qaqutigoorpallaarunnaassapput taamalu nalikillinerullutik.
Tamanna pissaaq Kinap atortussiassanik qaqutigoortunik tunisassiornini avammullu annissuinissamik inerteqquteqarnini attatiinnaraa. Atortussiassat qaqutigoortut clean-tech teknologiini atorneqartarput soorlu anorisaatinut innaallagissiuutinut biilinullu innaallagiatortunut. Naatsorsuutigineqarpoq Kinap piffissamut sivisuumut periuseqarnermigut ullumikkut nunarsuarmi atortussiassat qaqutigoortut 95 procentii pigigai.
Aatsitassarsioqatigiiffiulli Molycorp-ip Las Vegasip eqqaani piiaaffik matunikoq ammaqqinnialerpaa. Ukiut marluk qaangiuppata taanna atortussiassanik qaqutigoortunik 20.000 tonsinik tunisassiortalissaaq, atuagassiaq technologyreview.com allappoq.
Tunisassiornissaq tamanna sanilliunneqassaaq siorna atortusiassanik qaqutigoortunik nunarsuarmi tamarmi tunisassiortoqarsimaneranut 120.000 tonsinik.