Ikuallannermi trillebøri atorneqartarpoq
Tasiilami eqqaanilu qatserinermut atortut sussaanngillat, pisortaq oqarpoq.
Trillebøri aappalaartoq pumpimik oqimaatsumik slangemillu takisuumik imalik.
Tassa Tasiilami qatserisartut atortui, ikuallattoqaleraangat ikuallanneq sukkasuumik qaminneqassappat.
Tasiilamut eqqaanullu tikeraareerluni Kommuneqarfik Sermersuumi sammisaqarfimmut pisortaq Mati Frederiksen allakkiamini allappoq.
Tikeraarnermi siunertaasimavoq paasiniassallugu kommunimi qatserinermi atortut assigiinngitsut suut pigineqarnersut. Taamatut allappoq Kommuneqarfik Sermersooq qupperbnermini nittartakkami.
Mati Frederiksenip Sermersuullu paasisai tassaapput:
- illoqarfimmi nunaqarfinnilu qatserisartut inaat aserfallatsaalineqanngitsut, uffarfeqannginneq qatserisartullu atisaannik errorsisinnaannginneq aammalu qamutit larvefodillit snescooterillu pisoqqat aserfallassimasut, tassa pissutsit pitsaanerpaajusussaagaluit sussaanngitsut ilamerngi.
Siunertaasimagaluarpoq Tasiilap nunaqarfii biilinik qatserutitaassasut assakaasunit sisamanit ingerlatitanik, qularnartoqarporli ukiukkut aputeqartillugu atorneqarsinnaanersut. Ilanngullugu ininik kissassimaartitanik inissaqanngillat qerruttoorsinnaallutik. Taamaattumik kommuni aalajangerpoq tamakkua pisiariniarnerat taamaatiinnarneqassasoq, isumaliutigilerlugulu nunaqarfinnut qamutit motoorillit suut naleqquttuussanersut.
- Qatserisartut misigikulasarpaat annaassiniarnerni politiinik suleqateqarnermik ajornartorsiuteqartoq. Assersuutigalugu aqqusinikkut ajutoornermi politiit inunnik biilinik annaassiniartarput. Suliassani tamakkunani politiit annaassiniarnissamut ilinniarsimanngillat. Qatserisartut aqqusinermi ajutoortoqartillugu kiggussimasunik peersissutissanik atortunik amigaateqarput aammalu inuilaami annaassiniarnissamut atisanik atortunillu amigaateqarlutik, Kommuneqarfik Sermersooq allappoq.