Qaqortumi anitsitsinerit amerlanerpaapput
Namminersorlutik oqartussat kommunillu inissiaataanni anisitsinerit nunap immikkoortuini nikingasupilussuupput.
Qaqortoq tassaavoq piffissaq eqqorlugu inigisamut akiliinngitsoortartut amerlanerpaaffiat, naggataagut namminersorlutik oqartussat kommunillu inissiaataannit anisinneqarlutik.
Ukiup ingerlanerni Qaqortumi ininik attartornerit 43-it atorunnaarsinneqarput. Tulleraa Paamiut tassani 28-t atorunnaarsinneqarlutik Sisimiunilu 23-t.
Nunatsinni tamarmi katillugit 219-it anisitaapput. Taakunannga 138-t inissaminnik tunineqaqqipput tassalu 63 procentit missaaniittut.
Nunap immikkoortuini nikingassutit ilaatigut Nuummi Tasiilamilu ersarinnerupput. Naak illoqarfiit inoqassutsimikkut assigiinngikkaluaqalutik anisitsinerit amerlaqatigiingajapput, Nuummi 19-iullutik Tasiilamilu 17-iullutik.
Tamanna INI-mi, Iserimi Kommune Kujallermilu naatsorsuinerit takutippaa.
Naatsorsuinerit saqqummiunneqarput IA-miit Olga P. Berthelsen paragraf 36 malillugu Isumaginninnermut naalakkersuisumut Maliina Abelsenimut apeqquteqareersorlu.
Olga P. Berthelsenip apeqqutaani nunatsinni angerlarsimaffeqanngitsut amerlassusaat aamma tikinneqarpoq.
Maliina Abelsenip tikkuarpaa suliaq taanna qulaajarneqaleruttortoq misisuinerimmi kingulliit 2008-meersuupput.