Uulia liiterimut 10 øremik akitsussaaq
Uuliamik pissamaatit tatineqarput tamannalu pissutigalugu uuliap akia qaffappoq. Taamaattumik KNI Polarpoil-ip akit qaffanniarpai.
Uulia maanna niuerutigineqarpoq nappartamut 91 dollarilerlugu, ukiunilu marlunni akiaaatsaat taama qaffasitsigaaq.
Akit tamakkua KNI Polaroil-imut aamma sunniupput. Ukiortaami iteruit uulia liiterimut 10 øremik akitsorsimassaaq.
Akip qaffannera aamma 10 øremik qaffaanerup qaavaniippoq, tassa uuliap akia qaffammat Inatsisartut 2011-mi nukissiornermut uuliamut avatangiisinut akitsuusiimmata.
Tassa ataatsimut isigalugu liiterimut 20 øremik anginerusumik akiliisalissaatit avatangiisinut akitsuut KNI Polaroil-iatalu qaffaanera pissutigalugit.
- Kingullermik aki qaffatsinneqarpoq 2009-mi februaarip 9-anni liiterimut 5 øremik. Kingorna atuisartunut aki aalajangiusimaannarneqarsinnaasimavoq KNI A/S Polaroil-ip periusaa pissutigalugu. Maanna akit ima qaffassimatigaat akit iluarsisariaqarlutik, KNI Polaroilip pisortaa Peter Grønvold Samuelsen oqarepoq.
Taamaasilluni aappaagu akit imaalissapput:
Gasolie/diesel: 4,47 kr. liiterimut
Benzin: 4,47 kr. liiterimut
Petroleum: 4,57 kr. liiterimut
Jet A-1: 4.49 kr. liiterimut