Nunatsiniit nersussuup neqaa tuniniarneqalerpoq
Kalaallit Nunaanni Brugseni nunatsinni niuertarfiutileqatigiinnit siullersaalluni nunatsinniit nersussuup neqaanik tuniniaalerpoq
Nersussuit Narsami savaatilimmit nersussuaatilimmillu uumasuutigineqarput. Nunattalu kujataaniit nersussuup neqaa qanoq mamaqarnersoq Nuummi Brugsenimi pisiniartartut tallimanngorpamiit decembarip 3-aniit paasisinnaalissavaat. Neqi siusinnerusukkut tuniniarneqalersussaagaluarpoq umiarsuakkulli assartuinermit kinguaattoortinneqarsimalluni.
Nersussuit Irlandimeersuupput Dexterinik taaguuteqartut, taakkulu Sofus Frederiksenip Narsap Iluani narsaatimini uumasuutigai.
Savaatillip tusagassiuutitigut nalunaarummi oqaluttuaraa nersussuaateqarneq misiliilluni suliniutigigini, nersussuarnimmi nerineqartussanik siullersaalluni uumasuuteqartuuvoq.
- Takorluugaraara savaateqarnermiit nersussuaateqarnermut ikaarsaariarnissara neqaat pisiniartartunit ilassilluarneqassappat, Sofus Frederiksen oqarpoq.
Sofus Frederiksenip neqi neriniartarfinnuinnaq tuniniartaraluarpaa aatsaallu siullermeertumik nerisassaarniarfinnut tuniniarlugu.
- Neriuppunga Brugsen Nuummi pisisartut ilassiluassagaat isumaqarpungami kujataani uumasuuteqarneq ineriartortittariaqaripput, oqarpoq.
Kalaallit Nunaanni Brugseni Nuummi Brugsenimi nunatsinni nersussuup neqaanik misiliilluni tuniniaaniarluni aalajangiivoq.