Imarsiornermi qallunaat-kalaallit isumaqatigiissutaat nutaaq
Kalaallit Nunaata imartaani umiartornermi isumannaatsuunerup annertusarnissaanik suleqatigiinnerup nukittorsarnissaanik Danmark Namminersorlutillu Oqartussat pingasunngormat isumaqatigiissuteqarput.
Aningaasanut inuussutissarsiornermullu ministerip Brian Mikkelsenip aamma ineqarnermut, atortorissaatinut angallannermullu naalakkersuisup Jens B. Frederiksenip isumaqatigiissut atsiorpaat.
- Kalaallit Nunaata imartaani umiartorneq isumannaatsuullunilu toqqissisimanartuussaaq. Taamaattumik Kalaallit Nunaata imartaani isumannaatsuunermik pilersitsiniarluta suleqatigiilluarnitta nukittorsarnissaa pillugu ullumi Kalaallit Nunaanni Namminersorlutik Oqartussanik isumaqatigiissuteqarpunga. Kalaallit Nunaata Danmarkillu akornanni suleqatigiinneq isumaqatigiissutikkut nukittorsarparput, tamannalu imaani isumannaatsuunermut avatangiisinullu iluaqutaassaaq. Kalaallit Nunaata imartaata issusia silallu pissusia pissutigalugit minnerunngitsumik ilaasunik angallassinermut atatillugu pingaaruteqarpoq isumannaatsuunerup pitsaasuulluarnissaa, aningaasnut inuussutissarsiornermullu ministeri Brian Mikkelsen oqarpoq.
Ineqarnermut, atortorissaatinut angalannermullu naalakkersuisoq Jens B. Frederiksen:
- Issittup imartaani umiartornerup sammineqarnerulernera nuannaarutigaara. Pingaaruteqarpoq isumannaatsuunermik sulinerup kalaallinut innuttaasnut iluaqutaanissaa. Kalaallit Nunaanni qaammammut marluk angullugit ipilluni ajunaartoqartarpoq taakkulu amerlavallaaqaat. Taamaattumik suliniut, angallatini qanoq ittuni tamani ajunaarnerit annikillisarnissaannik kalaallit qallunaallu oqartussaasuisa ataatsimut suliniuteqarfigisaat pingaaruteqarpoq. Ilaatigut pineqarpoq angallatini nuannaariutini mikinerni pinngitsoorani isumannaatsuunermut atortoqarnissap eqqunneqarnera.
Suleqatigiinnissamik isumaqatigiissut aamma imaqarpoq attaveqarnermut ataatsimiititaliamik nutaamik, tassani qanimut oqaloqatigiittarnerit imaani isumannaatsuunermik nukittorsaaqataassallutik ajunaarnernillu pinngitsoortitseqataassallutik.
Kalaallit Nunaata, Issittup Sikuiuitsullu Kujalliup imartaanni umiartornermi isumannaallisaanermi Danmarki Kalaallit Nunaallu nunani tamalaani siuttuupput. FN-ip imarsiornermik suliniuteqarfiani IMO-mi Danmark arlalinnik siunnersuuteqarsimavoq sumiiffinni avatangiisit sunnertiaffianni inuilaamilu isumannaatsuunermik nukittorsaaqataasussanik.
Taamatut allappoq oem.dk.