Angerlarsimaffiup avataanut inissiisarnerit
Meeqqat angerlarsimaffiup avataanut inissinneqarsimasut 1200-t amerlavallaaqaat, IA-meersoq Debora Kleist isumaqarpoq
Angerlarsimaffiup avataanut inissinneqarnermikkut meeqqat nalorninermik toqqissimannginnermillu misigisimasarput. Taamaattumik IA isumaqarpoq meeqqat 1200-t angerlarsimaffiup avataanut inissinneqarsimasut amerlavallaartut inuiaqatigiinnullu pitsaanngitsumik kinguneqarsinnaallutik.
– Ersissutigaarput angerlarsimaffiup avataanaut inissinneqarnikkut meeqqat inuusuttullu misigissutsikkut suli ikeqarnerulissasut, kinguneqaatissallu inuiaqatigiinnut ataatsimut isigalugu kisissaanngitsuussapput pingaartumillu kommuninut annertuujussuallutik. Taamatut oqarpoq IA sinnerlugu inatsisartunut ilaasortaq Debora Kleist.
– Inuit Ataqatigiit isumaqarput isumaqarput meeqqanut inuusuttunullu siusissukkut iliuuseqartarnissaq pisariaqartoq, piffissaq ungasinnerusoq isigalugu inuiaqatigiinnut tamanna angusaqarnerpaaffiussammat. Taamaattumik tamatumani suliniutissat assigiinngitsut pilersaarusiornissaat pingaaruteqartorujussuuvoq.
– Suliniutitsinni anguniartariaqarpavut ilaqutariit ingerlalluartut imminnut pilersortut, taamaasilluni ilaqudtariit qitornatik toqqissisimanartumik pitsaasumilu peroriartortissinnaammatigit, taanna isumaqarpoq oqaatigalugulu ilaqutariinnut meerartalinnut suliniutissat assigiinngitsut aalajangersimasumik periarfissaasariaqartut. Tassaasinnaapput angajoqqaanik pikkorissartitsinerit, ilaqutariinnik katsorsaanerit, atornerluinermut katsorsaanerit - tamanna pisariaqarpat, aammalu isumaginninnikkut siunnersuineq.
Debora Kleist isumaqarpoq suilniutissat arlallit pingaaruteqartut:
Naartusumut siunnersuineq iluuseqarnissamullu pilersaarusiorneq pisariaqartitsineq malillugu
Anaananut inuusuttunut allanullu pisariaqartitsisunut siunnersuineq iliuuseqarnissamullu pilersaarusiorneq, akisussaassutsiminnik nutaamik tigusinissaannut piareersarumallugit.
Ilaqutariinnut højskolit angajoqqaanillu pikkorissartitsinerit.
Angajoqqaarsianut pikkorissartitsinerit, angajoqqaarsiat ulluinnarmi atugaasa pitsanngorsarnissaannut suliniuteqarneq. Angajoqqaarsianik sullissineq.
Meeqqat inuusuttullu pitsaanerusumik inuuneqalernissaannut suliniuteqarnerit.
Ulloq unnuarlu paaqqinnittarfiit atuisunut sulisunullu pitsaanerusut.
– Siuliani taaneqartut piviusunngortinneqarpata Inuit Ataqatigiinni qularutiginngilarput meeqqat inuusuttullu inuunerminni atugaat pitsaanerulissasut. Angerlarsimaffiup avataanut inissiinissamut pisariaqartitsineq annikillissaaq, Debora Kleist oqarpoq ilanngullugulu oqaatigalug pisariaqartoq tamatta inuunitta nalilersornissaa, aatsaat taamaasiornikkut inuiaqatigiinnik peqqissunik nukittuunillu tunngaviliisinnaagatta.