Julimaaq sipaarniutigineqarpoq
Aningaasatigut ajornartorsiorneq malunnaqaaq, juullip inui eqqorneqarput.
Angutit pitsaasut aappalaartunik atisallit ukioq manna qaqutikkut takussaalerataannaapput. Tassami juullip inuinut aamma allaffeqarfiannut paasiniaanermi nalunaarmata angutitsialaap taassuma puallakajaap juullimi tunissutissanik poorsuarmi nammattup apeqqutigineqartarnera annikilleriarsimasoq.
Taamatut allaaserisaqarpoq metroXpress.
Nuna tamakkerlugu niuertarfiit aamma niuertarfippassuaqarfiit juulimaaq sipaarutigaat, suliffeqarfinnilu minnerusuni sulisut qitornaasa naatsorsuutigissanngilaat qaqortunik umissualimmik takusaqarnissaminnut aamma ho-hoortumik juullimi aaqqissuussinerni tusagaqarnissaminnut.
- Aningaasatigut ajornartorsiortoqalermalli saaffigineqartarnerput annikilleriarsimavoq. Maanna suliffeqarfiit juullimi orpiliartitsisarneq atorunnaarsippaat sulisumik soraarsitsinissartik pinngitsoorniarlugu, aamma niuertarfippassuaqarfiit sipaarniuteqarput, Henrik Jacobsen oqarpoq, taanna Dansk Julemands Laugimi, juullip inuisa soqutigisaqaqatigiiffianni, siulittaasuuvoq.
Sullissisarfimmi Showbizz Danmarkimi, juullip inui peqataatillugit aliikkusersuinermik aaqqissuussisartumi, maluginiarneqarpoq ingammik illoqarfimmi peqatigiiffiit soqutiginninnerat annikinnerulersimasoq. Taakku juullip inuanik peqataatitsiniarlutik saaffiginninnerat siornamut sanilliullugu ukioq manna 25 procentimik appariarsimavoq, taamatut nassuiaavoq impresario Ernst Brandstrup.
Suliffeqarfiit namminersortut minnerit illumut akiliummik aningaasarsianullu sipaaruteqarsinnaanngillat. Kaaviiaartitat ikinneruppata, kukkunersiuisumillu malersorneqarunik, taava pisariinnerpaamik sipaarniuteqassapput, tassalu juullimi aliikkusersuinermi.