Atuarfiup matunissaanut ilinniartitsisut akerliussutsimik takutitsipput
Kommuneqarfik Sermersuup 2011-mut missingersuummi sipaarniutissat aalajangiusimavai
Atuarfiup Qorsussuup matunissaa akerleralugu siullermik atuartut akerliussutsimik takutitsipput, meeqqallu atuarfiat aappaagu millionilinnik sipaarniarfigineqarnera akerleralugu ilinniartitsisut ualimut akerliussutsimik takutitsipput, tamakkuali iluaqutaanngillat.
Kommuneqarfik Sermersuumi kommunalbestyrelsip 2011-mut missingersuut marlunngormat akuersissutigaa, tassuunakkullu atuarfeqarneq millionilikkaanik sipaarfigineqassaaq: Atuarfik Qorsussuaq aasaru matussaaq, illoqarfiup ilaani Qinngutsinni Nuup atuarfittaava Atuarfik Hans Lynge ammarneqarpat, holdinullu agguataarinermi ilinniartitsisut pingajui atorfiit 55-iniit 20-inut ikilineqassapput.
Ilinniartittsisut 100-t allagartarsualerlutik højtalerimillu suaartaaserlutik ilinniartitsisut kattuffiup IMAK-ip Saqqarlerni illuutaanit Rådhusimut ingerlaaqatigiipput, tassani utaqqisut borgmester Asii Chemnitz Narup, Ineriartornermut ataatsimiititaliap siulittaasua Mille Søvndahl Petersen, Ineriartornermut ingerlatsiviup pisortaa William Kriegel aamma atuarfeqarfiup pisortaa Hans Peter Broberg.
Atuarfitsialak ulorianartorsiorpoq
– Atuarfeqarfiup sipaaruteqarfigineqarnissaanik pilersaarutinut akerliuvugut, IMAK-p siulittaasua Sivso Dorph oqarpoq.
– Akerleraarput kommunip aningaasaqarnerlunnera meeqqat siunissaminnik akilissagaat. Akerleraarput meeqqat atugarliortut atugaasa suli ajorseriartinneqarnissaat. Ersissutigaarput klassini eqqissiviilliornerusoqartalissaasoq. Qorsussuup matuniarneqarnera toqqissimanngitsitsivoq, akerleraarpullu atuarfiup matuneratigut meeqqat avissaartinneqarnissaat.
– Kommuneqarfik Sermersuup sipaaruteqarniarneratigut Atuarfitsialak ulorianartorsiortinneqarpoq, ilinniartitsisut kattuffianni IMAK-mi siulittaasoq Sivso Dorph oqarpoq, ilinniartitsisunit akerliussutsimik takutitsisunit 100-nit tamakkiisumik taperserneqarluni.
Ajornakusoortoq
Borgmester Asii Chemnitz Narupip nassuerutigaa 2011-mut missingersuutip ataqatigiissinniarnera ajornakusoorsimasoq: – Sammisaqarfiit tamarmik misissuiffigineqarsimapput atugassarisat atorsinnaasavut atorluarniarlugit.
Borgmesterip nuannaarutigaa atuarfeqarnermi sammisaqarfiit arlallit sipaarniuteqarfigineqanngimmata, sulili kommunimit aningaasalersorneqassallutik namminersorlutik oqartussat peqqussutaat malillugu: – Sulilu klassimiittut naammaginartumik amerlassuseqartassapput.
Asii Chemnitz Narupip neriorsuutigaa marlunngorpat kommunalbestyrelsip ataatsimiinnerata kingorna ilinniartitsisut sinniisai oqaloqatigineqqassasut missingersuummi nutaami meeqqat atuarfiata atugassarisai aalajangersarniarlugit.