Uukapaatitsineq

Ilinniartitsisut peqatigiiffiata IMAK-ip siulittaasuata Sivso Dorphip tallimanngormat borgmesteri isornartorsiorpaa atuarfinnut sipaarniuteqarnermi tunngavinnik ataasiinnavallaartunik sunnerneqarnerarlugu

Sivso Dorph isumaqarpoq Kommuneqarfik Sermersoooq meeqqat atuarfianni sipaarniuteqartoq kukkusumik tunngaveqarluni. Ass.: Leiff Josefsen

Kommuneqarfik Sermersuumi borgmesteri Asii Chemnitz Narup sakkortuumik uparuarneqarpoq ilinniartitsisut peqatigiiffiata IMAK-ip siulittaasua Sivso Dorph tallimanngormat ualikkut Nuummi ilinniartitsisut akerliussutsimik takutitsineranni oqalugiarmat. Sivso Dorphip borgmesteri isornartorsiorpaa sipaaruteqarnissamik siunnersuutinut piviusorpalaanngitsunut tusaaniarpallaarsimasutut.

– Tusarsimavara meeqqat atuarfianni sipaarniuteqarnissamik aalajangiinissarsi sioqqullugu aningaasaqarnermik ilisimasalimmit Namminersorlutik Oqartussaneersumik oqalugiarfigineqarsimasusi. Taassuma oqarfigisimavaasi 11. klassit atorunnaarsinneqarsimammata atuartullu ikileriarujussuarsimammata ingerlatsinermi aningaasartuutit annertuumik appartinneqassasut.

– Taassuma oqaluttuussimanngilaasi ukiuni 11-ni atuarnermi ukiuni 10-ni atuarnermisut akunnerit atuarfiit amerlatigisassasut, Sivso Dorph tikkuaavoq.

– Aappassaanik taassuma ilinniartitsisut amerlassusaat qallunaat nunaanni pissutsinut sanilliussimavai. Oqaluttuussimanngilaasi Danmarkimi akunnerit ikinnerpaamik atuartitsiffissat 6810-usut, uagut 8560-iusut. Tassa uagutsinni ilinniartitsisunik pisariaqartitsineq minnerpaamik 26%-imik qaffassimavoq.

– Pingajussaanik oqaluttuunneqarsimavusi Finlandimi ilinniartitsisumut ataatsimut atuartut 15-iusartut. Oqaluttuussimanngilaasi Finlandimi atuartitsinermi ilinniartitsisunut tamanut ilinniartitsisumik ataatsimik ikiorteqartoqartartoq, ilinniartitsisut siulittaasuat oqarpoq.

– Neriuppunga tullianik immikkut ilisimasalimmik isumasiuissagussi isumagissagissi isumap ataasiinnaanngitsup saqqummiunneqarnissaa. Isumamik ataasiinnarmik tusartinneqarassi uukapaatinneqarpusi, taanna erseqqissaavoq.

Sivso Dorphip neriuutigaa sipaarniuteqarnerit akerleralugit ilinniartitsisut tunngavilersuutaat borgmesterip tusaaniassagai, tunngavilersuutillu tamakkua aappaagumut missingersuutinut pingaaruteqartillugit. Aappaagumut missingersuut kommunalbestyrelsip marlunngorpat ataatsimiinnermini oqaluuserissavaa.

Kommunip atuarfeqarnermi sipaarniuteqarneranut ilihniartitsisut akerliupput ilaatigut makkua pissutigalugit:

- Akerleraarput meeqqat siunissaminnik akiliisinneqarnerat

- Atuartitsinerup pitsaassusiata ajorseriannginnissaa qulakkeerusupparput.

- Meeqqat aamma atuarfimmi sumiginnarneqartutut misigisimanissaat pinngitsoortikkusupparput.

- Meeqqat isumaginninnikkut sumiginnakkat atugaasa suli ajornerulernissaat akerleraarput.

- Ersissutigaarput klassini eqqissiviilliorneq annertuserujussuassasoq.

- Meeqqat avissaartinnissaat akerleraarput.

- Qorsussuup matuneqarnera sulisunut, atuartunut angajoqqaanullu toqqissisimanngitsitsivoq.

- Ilinniartitsisut pingajuata peerneqarnera kingulitsinnut akisuujussaaq.

- Sipaarniutissat piviusunngortinneqarpata inuiaqatigiiinnik ilinniagalinnik pilersitsinissamik sinnattoq angujuminaallissammat.

Powered by Labrador CMS