Qorsussuaq aappaagu matuneqassaaq

Taamatut ippassaq sisamanngornermi nalunaarfigineqarput atuarfiup siulersuisui, ilinniartitsisut elevrådilu.

Atuartut, angajoqqaat ilinniartitsisullu novembarip 3-anni atuarfiup matunissaa akerleralugu akerliussutsimik takutitsipput, iluaqutaanngitsumik. Ass.: Leiff Josefsen

Atuarfik Qorsussuaq klassinik naggataamik isaatitsissaaq 2011-mi juunip 24-ianni, ukiup atuarfiusumi 2010/2011-mi ullormi atuarfiusumi kingullermi. Taamaasilluni Qorsussuaq ukiuni 57-ini atoreerluni matussaaq.

Isumaqatigiinniaqatigiit tassaasut borgmester Asii Chemnitz Narup (IA), Mille Søvndahl Pedersen, Ineriartornermut ataatsimiititaliap siulittaasua (IA), aamma Martha Abelsen (S), Ineriartornermut ingerlatsivimmeersut marluk peqatigalugit nalunaarput atuarfiup matuneqarnissaa kommunalbestyrelsimut inassutiginiarlugu.

Oktobarimi Ineriartornermut ingerlatsivimmi sulisut oqaluttuarput atuarfiup matuneqarnissaanik inassuteqeaat arlalinnik tunuliaqutaqartoq. Kommuni ingerlatsinermi sipaarutinik nassaarniassasoq. Ukiuni kingullerni atuartut ikileriarujussuarsimasut. Aammalu atuarfik nutartertariaqartorujussuusoq aammalu atuarfiit amerlavallaalissasut Qinngutsinni atuarfik nutaaq aappaagu ammarpat.

Atuarfiup pisortaa Karl Frederik Danielsen kommunalbestyrelsip ataatsimiittarfiani paasissutissiinermi najuuppoq.

- Paasitinneqarpugut misissorsimagaluaraat atuarfik qanoq isilluni matujartuaartinneqarsinnaanersoq aammalu misissorsimallugu Qinngutsinni atuarfiup ammarneqarnera atuarfiup siunissaanut qanoq sunniuteqassanersoq. Imatut inerniliisimapput atuarfik matusariaqartoq, taanna oqarpoq.

Angajoqqaat, ilinniartitsisut, atuartut sulisulu allat suli ilisimanngilaat atuarfiup matunera namminerminnut qanoq sunniuteqassanersoq.

- Isumaqatiginniarnermut ataatsimiititaliap siunnersuutigaa atuartut, angajoqqaat, ilinniartitsisut ingerlatsiviullu sinniisuinik toqqaasoqassasoq, taassuma paasiniassallugu klassit nuunneqartussat qanoq pineqassanersut.

- Qorsussuarmit siunnersuutigisimavarput klassit avissaartinneqassanngitsut klasselærerillu atuarfimmut allamut taakkuninnga malinnaassasut, Karl Frederik Danielsen oqarpoq.

Taassuma ilanngullugu oqaluttuaraa Qorsussuaq siunissami Piareersarfimmit atorneqassasoq, tassani inuusuttorpassuit utaqqisut allattorsimaffiannut allatsissimallutik.

Powered by Labrador CMS