Qorsussuaq atorunnaaliivippoq
Qorsussuaq meeqqat atuarfiattut atorunnaassaaq, Sermersuumi kommunalbestyrelsi taamatut aalajangiivoq.
2011-mut missingersuutit akuerineqarnerannut atatillugu Kommuneqarfik Sermersuumi kommunalbestyrelsip ullumi 2010-mi kingullermik ataatsimiinnermini aalajangerpaa Qorsussuaq meeqqat atuartinneqarnerannut atorunnaassasoq.
Taamaattumik Qorsussuaq meeqqat atuarfiattut atorunnaassaaq Qinngutsinni atuarfik nutaaq aasaru 2011-mi atorneqalerpat.
Illoqarfimmi atuarfiit pisoqaanersaasa, 1953-imeersup, Qorsussuup matuneqarneranut kommunalbestyrelsip tunngaviginerarpaa atuarfik taanna aserfallassimammat aamma atuarfigissallugulu ullutsinnut tulluarunnaarmat.
Meeqqat atuartut ukiuni kingullerni qulini ikileriarujussuarsimapput, taamaattumik Nuummi arfinilinnik atuarfeqarnissaa tunngavissaqanngilaq.
Kommunalbestyrelsip anguniarlugu sulissutiginiarpaa illortaasa iluarsartuunneqarnissaat ilinniartitaanernullu allanut atorneqalernissaat, Qorsussuullu siunissami sumut atorneqalernissaanut nalilersuinissamut aningaasartuutinut matussutissanik immikkoortitsilluni.
Kommunalbestyrelsip pingaartippaa inuusuttuararpassuarnut meeqqat atuarfiani soraarummeerutaasunik naammassinnissimanngitsunut, imaluunniit ilinniaqqinnissamut pisariaqartunik angusaqarsimanngitsunut atuarfitoqqap illuutaasa suliarineqarlutik atorneqalernissaat.