Avannaani akileraarutip procentia avissaartortitsivoq
Missingersuusiorneq Kommunalbestyrelsip nalunaaqutaq 13.00 nangissavaa.
Qaasuitsup Kommuniani Inuit Ataqatigiit Siumullu suleqatigiinnerat avissartornermik ulorianartorsiortinneqarpoq.
Kommunimut akileraarutip 27 procentiusup 2011-mi attatiinnarneqarnissaa Siumup kissaatigaa, Inuit Ataqatigiit akileraarummut procenti ataatsimik qaffanniarlugu aappaagu 28 procentinngorlugu. Nuna tamakkerlugu akileraarut 11 procentiusoq kommuninullu ataatsimut akileraarut 6 procentiusoq ilanngullugut Qaasuitsup Kommuniani akileraarut 2011-mi 44 procentiunngikkuni 45 procentiussaaq.
Kommunalbestyrelsi, sisamanngormalli ataatsimiilersimasoq, Ilulissani nal. 13.00 ataatsimiileqqissaaq, partiit gruppimi ataatsimiinnerisa kingorna.
_ Akileraarutip procentia isumaqatigiinngissutaavoq, maannangaaq annertunerusumik oqaaseqarsinnaanngilara, IA-meersoq borgmesterip tulliata aappaa Bendt B. Kristiansen sermitsiaq.ag-mut oqarpoq.
Kommunip aningaasaqarnerlunnera pissutigalugu IA-p akileraarut procentimik ataatsimik qaffanniarpaa: – Allat tamarmik akisussaanngitsuliornerussapput, Bent B. Kristiansen oqarpoq.
– Gruppimi ataatsimiippugut taamaattumik oqaaseqarsinnaanngilanga, Siumumeersoq Palle Jeremiassen nalunaaqutaq 12.15 sermitsiaq.gl-imut oqarpoq.
Siullermiinngilaq Qaasuitsup Kommuniani politikkikkut avissaartuuttoqarnera. Qinersinerup kingorna Siumut Atassullu suleqatigiilerput, kingornali Atassut Inuit Ataqatigiinnik taarserneqarpoq. Aamma Siumup iluani avissaartuuttoqartarsimavoq, qaammatillu marlussuit matuma siornatigut borgmester Jess Svane, Siumut, Danmarkimi feriarnernini kipitiinnarlugu angerlapallappoq pissutsit iluarsiniarlugut.
Kommunalbestyrelsimi 21-inik ilaasortalimmi Siumut 10-nik, Inuit Ataqatigiit 5-inik, Atassut 3-nik, Kattusseqatigiit Partiiat 2-nik Demokraatillu ataatsimik ilaasortaatitaqarput.