Airbus-imik suliaqarneq Air Greenlandimi allannguisitsivoq
Timmisartoq Kangerlussuarmiit Danmarkiliartoq angumerissagunikku ullumikkumiit atuutilersumik angalasut siusinnerusukkut aallartalerput.
Ulluni tulliuttuni Air Greenlandimi Nunatta Danmarkillu akornanni timmisartumik angalasut Boeing 757-imik Euroatlanticip timmisartuutaanut ilaallutik angallanneqartalerput Air Greenlandip timmisartuutaanut Airbus 330-200-mut Norsamut taarsiullugu.
Teknikerit Norsamik pilersaarutaasumik aserfallatsaaliuinermut atatillugu Norsami immikkut suliassaqarnerannik tamanna patsiseqarpoq, timmisartuussileqqinnissaatalu tungaanut ulluni marlussunni timmisartoq suliarineqassaaq.
Taamaattumik Air Greenlandip timmisartoq pineqartoq Boeing attartorpaa, ataasinngornermi pilersaarutit malillugit pisarnertut Københavnimiit nalunaaqutaq 9 - qallunaat nalunaaqutaat naapertorlugu - aallassalluni. Kalaallit nalunaaqutaat malillugu Kangerlussuarmiit utissaaq nalunaaqutaq 11. Tamanna nalinginnaasumit sivikinnerusumik Kangerlussuarmiinnissamik kinguneqassaaq, tamatumalu nunap iluani timmisartuussinernut sunniuteqarpoq. Ilaasut arlallit pilersaarutinit siusinnerusukkut aallartariaqartassapput, taakkulu Air Greenlandimi sulisunit toqqaannartumik kalerrinneqartassapput.
Marlunngornermi Boeing aamma Air Greenlandimit Atlantikorsuaq qulaallugu timmisartuussinermut attartorpaa. Tassunga atatillugu qallunaat nalunaaqutaat malillugu Københavnimiit nalunaaqutaq 9 aallassaaq Kangerlussuarmiillu utissaaq nalunaaqutaq 13 kalaallit nalunaaqutaat malillugu.
Pilersaarutit malillugit allakkat assartorneqassapput, JetTimemiillu timmisartumik immikkut attartortoqarpoq nassiussanik usisussamik, tamannalu pissaaq pingasunngornermi.
www.airgreenland.gl -imi allannguutit malinnaavigineqarsinnaapput.