Marlunngornermi timmisartuussinissat kinguaattuussapput
Marlunngornermi Air Greenlandip timmisartuussinissaasa amerlanersaat ajoraluartumik kinguaattoornernik eqqorneqassapput.
Københavnimiit Kangerlussualiarnissaq nal.ak. sisamaat avillugu kinguartinneqarmat, timmisartumi inuttat inatsisit naapertorlugit qasuersaartussaanerannik peqquteqartumik.
Marlunngornermilu Atlantikoq qulaallugu timmisartuussinissaq Boeing 757-mik attartukkamik ingerlanneqassaaq, Air Greenlandip Airbus 330-iutaa Zürich-miimmat.
Københavnimiit marlunngornermi qallunaat nunaanni nal. malillugu 12.30 aallarnissaq pilersaarutaavoq, Kangerlussuarmullu nunatsinni nal. malillugu 13.10 apuutissaaq. Kangerlussuarmiit utimut nal. 14.30 aallassaaq Københavnimullu qallunaat nunaanni nal. malillugu 22.50 apuutissaaq.
Taamatut kinguaattoornerup nassataanik Air Greenlandip nunatta iluani timmisartuussinissai pilersaarutaasumit kingusinnerusukkut pissapput. Pineqartullu tassaapput GL488, GL571, GL580 aamma GL497, tamarmik nal.ak. pingajuat avillugu kinguartinneqartut. GL544 nal.ak. sisamangajaat kinguartinneqarpoq.
Timmisartunut taaneqartunut ilaasussat Air Greenlandimit attavigineqassapput, imaluunniit aallarfissami stationi namminneq attavigisinnaavaat.
Timmisartuussinissat timmisartorsuarmiit sinerissamut attuumassutillit ilaasussat tamarmik apuunneqarnissaat anguniarlugu aamma kinguartinneqarput.