Iluatsitsinngitsoornerup isumaqatigiissut akornusersinnaavaa
Sila pillugu FN-ip Mexico-mi ataatsimeersuartitsinerani angusanik tunngavissalinnik nunarsuarmi nunat isumaqatigiissinnaanngippata, aappaagu Sydafrikami sila pillugu isumaqatigiissuteqarnissaq nutaaq akornuserneqassaaq.
Kikkut tamarmik neriuutigaat. Amerlasuut tamaviaarlutik sulissutigaat. Ikittuinnaalli upperaat sila pillugu FN-ip Mexico-mi ataatsimeersuarnerani angusaqartoqarnissaa, sila pillugu siunissami isumaqatigiinniarnissami.
Nunarsuarmi tamarmi silamut avatangiisinullu ministerit ulluni pingasuinnarni isumaqatigiinniassapput, Mexico-mi illoqarfimmi cancun-imi atatasimeersuartarfimmi qulliit qaminneqannginneranni, kikkullu tamarmik angerlakaannginneranni.
Isumaqatigiinnerit ministerinit tuaviuunneqarnissaat taamaattumik pisariaqarpoq, siorna København-imi ataatsimeersuarnerup iluatsinngitsoortup kingorna uninngaannalersimasut.
Amerlanerimmi isumaqatigiissutigaat Mexico-mi pingaarutilinnik angusaqartoqanngippat, aappaagu Sydafrikami ataatsimeersuarnissami sila pillugu nunat tamalaat isumaqatigiissuteqarnissaat ajornakusoorliuinnassasoq.
- Maannakkut isumaqatigiissinnaanngikkutta takujuminaatsippara tassanngaannaq tupinnartuliornikkut qanoq pisoqassanersoq Sydafrikami isumaqatigiissuteqarnissatsinni. Tassani isumaqatigiissinnaasut allatut ajornartumik katersortsriaqarpavut, isumaqatigiissutaasinnaasullu angerlaallugit, Danmark-imi sila pillugu ministeri Lykke Friis Ritzau-imut oqarpoq.
Siorna København-imi pisoqarneratut illua-tungeriit inissisimasut nassuerutigaa, ataatsimeersuarnerullu sapaatip akunnerata aappaa avillugu ingerlanerani nunat imminnut qanilleriarsimanngitsut, isumaqatigiinniarnerit atorfilinnit ingerlanneqarmata.
- Inissinniunneq manna tikillugu annertusimavoq. Nunat isumatoqqatik saqqummiussimavaat, maannakkulli pisut siuariartulerput, Lykke Friis isumaqarpoq.
FN-ip allattuunera Ban Ki-moon marlunngormat mianersoqqussuteqarpoq, silap allanngoriartornerata nakkutigineqalernissaani nunarsuarmiut periarfissartik kingulleq atulussinnaleraat.
- Manna tikillugu suliniuteqarnerput naammassimanngimmat assut ernumassutigaara, naallu tunngavissalinnik uppernarsaatissaqaraluartoq ukiorpassuarnilu isumaqatigiinniartoqartaraluartoq unamminartut ilungersunartutut suli isummerfigisimannginnatsigit, Ban Ki-moon oqarpoq.
Cancun-imi ataatsimeersuarnissaq sioqqullugu ilimagineqareerpoq aappaagu Sydafrikami COP17 pillugu isumaqatigiissuteqarnissaq aatsaat akuersissutigineqassasoq. Amerlanerilli oqaatigiuartalereerpaat tamanna 2011-mi aamma pisinnaanngitsoq.
Cancun-imi ataatsimeersuarneq tallimanngorpat naammassissaaq.