Serminik misissuinermut millionillit
Silap qanoq innera sermit takutittarpaat, aammali sila sunnertarlugu. Taamaattumik paasinissaat pinaaruteqarpoq. Tamatuma misissuiffiginissaani qallunaaq ilisimatusartoq 7 millioner koruuninik tunineqarpoq.
Sermit sooq taamatut ingerlaartarpat? Lektor David Lundbek Egholm-ip ilisimatusarnerani apeqqut tamanna pingaarnersaavoq.
Tamatuma paasinerunissaani ullumi pingasunngornermi 7 millioner koruuninik tunineqassaaq, ilisimatusarfimmit Sapere Aude-mit, Det Frie Forskningsråd-imut atasumit. Ilisimatusartut inuusuttut kakkannerit sulisoriinnarnissaanni ilisimatusarneq anguniagaqarfiuvoq.
Videnskab taama nalunaarpoq.
- Taama annertutigisumik aningaasaliiffigineqarnikkut ph.d.-mik ilinniarsimasut marluk aamma postdoc ukiuni sisamani atorfeqartissinnaavakka. Tamanna ajunngilluinnarpoq, qiimmaallaataalluni, David Lundbek Egholm oqarpoq, Århus Universitet-imi Geologisk Institut-imi atorfilik.
Sermit ataanni qanoq pisoqartarnersoq toqqaannartumik malinnaaffigissallugu suliassaavoq annertooq. Tamatumunnga taarsiullugu qarasaasiami pisuusaartitsinerit nutaaliaalluinnartut David Lundbek Egholm-ip atorniarpai, qanoq pisoqartarnera misissorumallugu, erngup kinnganerillu sermit aallsartikkaangagit.
Qarasaasiami pisuusaartitsinerit inernerisa pitaassusiat misilikkumallugu, periaatsit pingasut ilisimatusartut atussavaat:
Sermip ataani kinnganerit aalajangersimasumik asertortarput aallartinneqaraangamik. Taamaattumik qarasaasiami pisuusaartitsinerit inerneri pissusiviusuni kinnganernut assersuunneqarsinnaapput, qarasaasiaq eqqortumik pissusilersorsimanersoq misilikkumallugu. Misissuisarfimmilu aamma misilittaasoqarniarpoq, taakkulu inerneri qarasaasiami angusarineqartunut assersuunneqarsinnaassallutik.
Sermit ilaat sukkasoorujussuarmik ingerlasarput. Tassalu sermeq piffissap ilaani uninngasarpoq, tassanngaannarlu sukkasuumik aallartarluni, tamatuma kingorna uneqqittarluni, sukkasuumillu aallaqqittarluni. Sermit sukkasuumik ingerlasartut pillugit paasissutissarpassuit katersorneqarsimapput, taamalu qarasaasiamik pisuusaartitsinermi paasisanut pitsaasumik tunngaviusinnaallutik.
Sermit qaqqat nungullartittarpaat taama ingerlaaraangamik, ilisimatusartullu ajornanngitsumik takusinnaasarpaat nunami siornagut sermeqarsimanersoq. Qaqqat nuui qooqqullu sermit ilaatigut ilusilersortarpaat. Sermitaqanngitsumik qarsaasiami nunaliornikkut, tamatumalu kingorna sermitalerlugu takuneqarsinnaasarpoq, qarasaasiami sermiliarineqartut pissusiviusunitut sunniisinnaanersut.