Timmisartortartunut isumaqatigiissut akuersissutigineqarpoq

Taamatut paasissutissiivoq timmisartortitseqatigiiffik, taasisitsinerulli inernerpiaa oqaatiginagu.

– Amerlanerussuteqarluartulli akuersissutigaat. Tamannalu takussutissaasimassaaq timmisartortartut, selskabitullu, isumaqatigiissut nutaaq naammagisimaaraat, Air Greenlandip HR-chefia Mads B. Christensen oqarpoq.

Taassuma oqaatigiumanngilaa isumaqatigiissutip nutaap imarisaa, ingerlatsiviup tamatumani isumaqatigiissutai allanut oqaatigeqqusaanngimmata.

- Oqarsinnaavungali tamatigoornerunissamik anguniagaarput angugipput, taamaasilluni akissarsianut taakkununnga sivisunerusumik timmisartortoqartalissalluni, Mads B. Christensen oqarpoq.

Air Greenlandip pisortaanerata Michael Binzerip siusinnerusukkut erseqqissarsimavaa ingerlatsiviup qaangerusukkaa taasani "timmisartortartut itigartitsisinnaanerat", sulinermi atugarisaat eqqarsaatigalugu.

Mads B. Christensenip oqaaseqarfigiumanngilaa tamanna allanngortinneqarsimanersoq, Sermitsialli paasisai malillugit Air Greenlandip piumasani tamanna angunngilaa.

Isumaqatigiissut nutaaq, oktobarimili ingerlanneqalersunik ajornakusoortumik isumaqatigiinniaqattaareerluni anguneqarpoq. Ilaatigut isumaqatigiissitsiniartartut siulittaasuat Asbjørn Jensen illua'tungeriinnik isumaqatigiissitsiniaraluarpoq iluatsinngitsumik. Aatsaallu ulluni arfinilinni timmisartortartut timmisartumilu saqisut mattusimanereersut Air Greenland timmisartortartullu isumaqatigiissuteqarput.

Timmisartortartut kattuffigaat Flyvebesætningsforeningen for Grønland (FFG), kattuffiup Flyvebranchens Personale Union-ip (FPU)ataaniittoq. FPU aamma kattuffiup LO-p ataaniippoq.