Isumaqatigiinniarnerit unitsillugit eqqarsarput
Isumaqatigiinniarnerit arfininngorpat Danmarkimi nalunaaqutaq malillugu 11.00 aallarteqqinneqassapput
Tallimanngormat unnuanngortoq isumaqatigiissitsiniartartup Asbjørn Jensenip Air Greenlandip aamma timmisartortartut isumaqatigiiniartui eqqarsaqqullugit angerlartippai. Asbjørn Jensenip nalilerpaa piffissap taamaalinerani illuatungeriit imminnut ungasippallaarnerat pissutigalugu isumaqatigiinngiarnerit ingerlatiinnarnissaat pisariaqanngitsoq. Air Greenlandip tusagassiuutitigut nalunaaruteqarluni ilisimatitsissutigaa arfinngornermi Danmarkimi nalunaaqutaq malillugu 11.00 isumaqatigiinniarnerit nanginneqassasut.
Tamanna tunngavigalugu suli nalunarluinnarpoq timmisartortartunik aamma timmisartuni saqisunik mattussiniarluni ilimasaarut sapaatiuppat 9. januaari atuutilissanersoq, Air Greenland erseqqissaavoq.
Mattussineq piviusunngussappat tamatuma kingunerissavaa Air Greenlandimi timmisartornissat tamarmik taamaatinneqarnerat. Sapaammi timmisartornissanik pilersaaruteqartoqanngilaq kisianni ataasingorpat timmisartut aamma helikopterit aallartussat 65-it aamma ilaasussat 1200-ngajaat eqqorneqassapput. Isumannaallisaarnermut sillimasoqassaaq taamaalilluni peqqinnissaqarfimmik timmisartuussinissat inuup inuuneranik naleqarsinnaasut ingerlanneqarsinnaaniassammata, suliffeqarfik ilisimatitsivoq.
Mattussineq pivisunngussagaluarpat sullittakkat timmisartornissanik taamaatiinnarneqartunik eqqugaasut Air Greenlandimit attavigineqassapput – toqqaannartumik imaluunniit angalatitsivik bilitsimik pisiffigisimasaq aqqutigalugu. Ilaasussat bilitsiminnik utertitsisinnaanerannik imaluunniit aaqqiaginnginneq qaangiuppat allatussamut inissalimmut siullermut aallarnissap nuunneqarsinnaaneranik neqeroorfigineqassappput.
Air Greenlandimut aallaviussaaq ilaasut namminneq unnuviffissaminnik periarfissaqanngitsut akiliullugit unnuisinneqarnissaat kiisalu ullaakkorsiortinneqarnissaat. Ilaasunut Danmarkimi imaluunniit Islandimi ingerlaqqissinnaajunnaartunut ulloqeqqasiorneq aamma unnukkut nerisaqarneq EU-mi maleruagassat tunngavigalugit aamma atuuppoq.
Suliffeqarfiup sapaatiuppat telefon normut toqqaanartumik sianerfigineqarsinnaasut pilersissavai, inuit aaqqiagiinnginnerup nalaani ilaasutut pisinnaatitaaffimminni aamma periarfissaminnik nalornisut taakkununnga sianersinnaapput.
TOQQAANNARTUMIK SIANERFISSAQ KALAALLIT NUNAAT
Telefon-nummer: +299 34 33 35
Email-adresse: kontakt@airgreenland.gl
Sapaatiuppat 9. jan. ammassaaq nal. 14.00 – 22.00 Kal. Nunn. Nalunaaqutaq malillugu
Tamatuma kingorna ullut tamaasa ammarsarfii nal. 08.00 - 20.00 Kal. Nunn. Nalunaaqutaq malillugu
TOQQAANNARTUMIK SIANERFISSAQ DANMARK
Telefon-nummer: +45 32 46 22 40
Email-adresse: glcopenhagen@airgreenland.dk
Sapaatiuppat 9. jan. ammassaaq nal. 09.00 - 23.00 Danmarkimi nal. malillugu
Tamatuma kingorna ullut tamaasa ammarsarfii nal. 07.00 - 23.00 Danmarkimi nal. malillugu
Aaqqiagiinginneq aallartivissagaluarpat Air Greenlandip nittartagaa ingerlaavartumik nutaarsiassanik kingullernik saqqumiussaqartassaaq, ikinnerpaamik ullormut marloriarluni, ullaap tungaani aamma ualikkut ataasinngorneq aallarnerfigalugu. Nittartakkami aammattaaq toqqaannartumik attaveqarfissat pillugit paasissutissat takuneqarsinnaapput kiisalu ilaasussatut aaqqiagiinnginnermik nalaanneqaraanni bilitsimik utertitsinissamik kissaateqaraanni immersugassaq.