Akiitsoqarneq mamiagineqarpoq

Sisimiuni ukiuni tallimami siullermeertumik radio pillugu ataatsimeersuartoqarnerani taamaallaat taasisinnaasut 28-t takkupput. Sisimiut Tsaataata naatsorsuutai 11 million koruuninik amigartoorput - naatsorsuutit nalunaarusiarlu akuerineqarput.

Taasisinnaasut ikittuinnaat takkussimapput, ilaasortanit 2050-init 28-iinnaat, taakkulu siulittaasup Søren Alaufesenip oqaaseqaatai pisortallu Jens Klavs Lennertip naatsorsuutai 228.891 koruninik amigartoortut, 11 million koruuninillu akiitsoqarfiusut akueralugit. Arlallit tamanna assut tupigaat, aamma takkussimasut taasisinnaanngitsut. Taakku ilagaat Lars K.S. Olsen aamma Hans Frederik Olsen, marluullutik Sisimiut TV-anni suliaqarsimasuullutik ataatsimiititaliamiissimallutillu.

Sisimiut TV ukiup ataatsip missaa matuma siorna immikkut ittumik ataatsimeersuartitsimmat 200 takkupput, taamanikkut taamaallaat 1,9 million koruuninik amigartoortoqarluni, tamannalu peqqutigalugu piumasaqaatit sukaterneqarlutik. Ataatsimiigiartut siulersuisut tunuarnissaat piumasaraat - pisortaq tunuareersimavoq - iluarsartuussinerlu annertooq ingerlanneqalerluni. Neriorsuutit sakkukitsut naammagineqangnitsut Hans Frederik Olsenip tv-mi siulersuisuniissimasup eqqaamavaa, tatiginnikkunnaarnermillu nalunartoqarnissaa piumasarineqarluni.

Aamma Lars K.S. Olsen TV-mi immikkut ittumik ataatsimiititaliamiissimasoq tupigusuppoq: Iluamik oqassagaanni aqutsisut tunuartariaqarput. Tamanna akisussaassuseqanngilaq. Siorna TV-mi paatsiveerunneq uuunga sanilliullugu suunngilaq.

Lars K.S. Olsen aamma Hans Frederik Olsen tupigusupput radio binngprnermut akitsuummik 2,8 million koruuninik akiitsoqarmat, akileraarutinillu A-nik 1,2 million koruuninik akiitsoqartoqarluni. Lars K.S. Olsen isumaqarpoq akileraaruseriffik sinivataarsimasoq.

Nutaamik ataatsimeersuarneq

228.891 koruuninik amigartoorneq iliuuseqarfiginiarlugu radiumik aqutsisut amerlanerusunik isertitaqarnissaq neriuutigaat annertunerusumik tuniniaanikkut. Tamanna Nuummi radiup iluatsittumik ingerlassimavaat, tamannalu aamma Sisimiuni iluartissagunarluni, Sisimiut Tusaataata pisortaa Jens Klaus Lennert oqarpoq. Qanorpiarli iliorniartoqarnersoq aqutsisoqatigiit oqaatigiumanngilaat.

- Soorunami eqqarsaatersorpugut allanillu iliuusissaqarluta. Oqaatigiumanngilavulli siulersuisunit nutaanit isummerfigineqarsimatinnagit, oqarpoq.

Ataatsimeersuaqataasut arlaanaataluunniit akiitsut taama annertutigisut akisussaaffigerusungnilai,Karl Mikkelsenili siulersuisuni ilaasortaasimasoq siulittaasumik Søren Alaufesenimik taarsiinissaminut akuersivoq. Karl Mikkelsen uparnaamut ataatsimeersuartoqarnissaata tungaanut siulittaasuussaaq. Tassani siulersuisut nutaat aaqqiissutissanik iliuusissanillu siunnersuuteqassapput.

Paasissutissat

Akileraaruseriffimmiit suliat ataasiakkaat oqaaseqarfigineqarneq ajorput, nunatsinnili akileraaruseriffimmiit Morten Kahlke oqarpoq, akiitsut akilertinniarneranni suliffeqarfiit matuinnarnissaat anguniagarineq ajorlugit.

- Suliffeqarfiit suleqatiseruaannartarpavut. Kisianni soorunami suleqatigiinnissaq kissaatigineqanngikkaangat sakkortunerusunik iliuuseqarniarsarisarpugut. Imaassinnaavoq suliffeqarfiup pissarsiassaanik ilanngaasugut, tunisassiaanik pissarsilluta imaluunniit pinngitsaalillugot tuniniaasillugit. Anguniagaqartumilli suliuaannarpugut. Akileraarutip A-p akilerneqarnissaanut isumaqatigiissusiortuartarpugut. Kingorna akiitsut akilerneqarnissaannut naaffeqartumik akiliinissamik isumaqatigiissusiortarluta.

Powered by Labrador CMS