Peter Davidsen Pinngortitaq pillugu Nersornaatisisoq
Avatangisiinik maluginiagaqarluarneq pillugu nersornaatisineq ataqqiniarneqarpoq. Avatangiisinut Pinngortitamullu Nersornaammik 25.000 koruuninik aningaasartalimmik Peter Davidsen ullumi tunineqarpoq.
- Peter Davidsen sulitilluni sulinngiffeqarnerminillu pinngortitamik nakkutilliisarpoq, tamannalu pillugu allanik ilinniartitsisarluni. Eqqagassat immikkoortiterneqartarnerat isumagisarpaa, meeqqat atuarfianni ilinniartitissutut meeqqanik aallaarsimaartitsigaangami, igiatassallu ikuallassinnaasut ikuallattarlugit, eqqagassallu arrortinneqarsinnaanngitsut Nuummut oqquttarlugit. Sulinngiffini pinngortitami annertuumik atortsrpaa. Igitassat allanit qimaannarneqarsimasut takugaangamigit ingerlaannaq katersulersarpai igillugillu. Pinngortitaperiaginissaani taamaalilluni Kalaallit Nunaanni tamanut maligassiuisuuvoq, pinngortitap avatangiisillu aamma eqqaavigineqannginnissaanni.
Peter Davidsen nersornaammik 25.000 koruuninik aningaasartalimmik tunigamiuk Nunami Pissutsinut, PInngortitamut Avatangiisinullu naalakkersuisoq Anthon Frederiksen taama oqarpoq.
Kikkunni tamani pinngortitaq avatangiisillu pillugit paasisaqarnerunissami inuit, suliffeqarfiit imaluunniit kattuffiit maligassiuisut piumassuseqarluartullu nersorniarlugit nersornaammik agguassisoqartarpoq, imaluunniit suliniuteqarnermikkut Kalaallit Nunaanni avatangiisit pitsanngorsarnissaannik tunngavissalimmik suliniuteqarsimasunut.