Naalakkersuisoq pinaveersaartitsinermik paasisaqarnerorusuppoq

Sisamanngornermi decembarip 16-iani Jægergårdsgademi SundhedsCenter kalaallit peqqissutsimut naalakkersuisuannit Agathe Fontainimit tikeraarneqassaaq.

Agathe sapaatit akunneranni tulliuttumi Danmarkimut tikeraassaaq pinaveersaartitsineq paasisaqarfiginerorusullugu. Assiliisoq: Benny Kokholm

- Kalaallit naalakkersuisuata atorfilittaasalu Århusimi SundhedsCenterip inooriaatsimik peqquteqartumik nappaateqartunik sullissinerani misilittagai, minnerunngitsumillu inuit anigorsinnaanngisaminnik nappaatillit - soorlu KOL-imik - pillugit qanoq peqqinnerulernissaannik suliaqarnera pillugu paasisaqarfiginerorusullugu tikeraassapput, taamatut oqarpoq Århusimi Folkesundhed - inuit peqqissuunissaannut tunngatillugu pisortaq, Bjørn Hvidt-Pedersen.

Taamatut allaaserisaqarpoq Aarhus Kommune Nunatsinnit tikeraartoqarnissaa pillugu.

Ilaatigut Århusimi SundhedsCenterip inuit anigorsinnaanngisaminnik nappaateqartut pillugit suliaqartarneranut tunngasunik, pillorissaasarnermik minnerunngitsumillu pinaveersaartitsinermik qitiutitsinissamut tunngasunik tikeraat ilisimatinneqassapput.

Naalakkersuisup SundhedsCenter Århus, Jægergårdsgademiittoq sisamanngornermi 16. december nalunaaqutaq 09.00 - 12.00-ip tungaanut pulaassavaa.

Powered by Labrador CMS