Mærsk uuliamik misissuisarfiliorniarpoq
Kitaani uuliamik misissuisarfiliortoqarneratigut misissugassat Europamut assartorneqarneranni ajortinnissaat pinngitsoortinneqarsinnaavoq.
Mærsk Oil, danskit umiarsuaatileqatigiiffiata A.P. Møller Mærskip suliffeqarfiutaasa ilaat, Baffinip kangerliumarngani uuliaqarneranik misissuisinnaanermut ukiaq tuniniarneqartut akuersissutit ilaat pissarsiarai.
Mærsk Oilip misissuisinnaaneranut akuersissutigineqartoq Kalaallit Nunaata avannaani Upernaviup avannamut kitaata tungaaniippoq, suliffeqarfillu uuliaqarneranik misissuinissaminut atatillugu misissuisarfissamik sanatitsiniarpoq pisortanit, suliffeqarfinnit allanit aamma ilisimatusartunit atorneqarsinnaasartussaq. Kisianni Mærsk Oilip aamma nammineq. soqutigisarilluinnarpaa Nunatsinni misissuisarfeqalernissaa.
- Uagut aamma kissaatigaarput misissuisarfeqarnissarput immamit qaqitat, soorlu immap sunik akoqarneranik aamma kinnit ujaqqat misissugassat ingerlaannartumik paasisaqarfigisarnissaannut periarfissaqaqqullugu. Taamaaliornikkut misissugassat katersukkagut ungasissumukaanneranni, assersuutigalugu Europamut, ajortinnissaat pinngitsoortinniarlugu, Mærsk Oilip misissuisartuisa pisortaat, Lars Nydahl Jørgensen KNR-imut taamak oqarpoq.
KNR malillugu Mærsk Oilip kissaatigineruvaa Baffinip kangerliumarngata eqqaani imaluunniit Nuummi misissuisarfeqalernissi.
KNR-ip misissuisarfeqalernissaanut tunngasoq inuussutissarsiornermut aatsitassarsiornermullu Naalakkersuisumut, Ove Karl Berthelsenimut aamma NunaOilimeersumut Hans Kristian Olsenimut saqqummiuppai.
Tamarmik oqarput Qeqertarsuarmi misissuisarfeqalernissaa tulluarsoraat.