Ikkuffik ajoqutilik angallammik ikuallatsitsivoq
Siorna angallammi Uiloq-mi qulliup ikkuffiatigut ikuallalerneq inuttat periataarnermikkut qamippaat, ajutoornermut nalunaarusiami Søfartsstyrelsi inerniliivoq
Usisaat Uiloq siorna septembarimi Kapilisinniit Nuummukarpoq. Issimasorai ilaasut arfinillit inuttallu marluk. Angalanerup nalaani nalunaaqutaq 16.15 missaani plastikkimik ikuallassunnitsoq paasineqarpoq inuttallu paasivaat ajortoqartoq.
Inuttat siullermik maskiinaqarfik misissorpaat tassanilu ajortoqarpasinngilaq. Tamatuma kingorna lasti alakkarneqarpoq, lastillu matua ammarneqarmat inneq meterip affaanik qummut naarallappoq sekundillu 15-it missaanni pujortorujussuuvoq.
Inneq angallatip inuttaanit qatserutinik marlunnik qatserneqarpoq minutsillu marlussuit qaangiuttut qaminneqarluni.
Ilaasut arfinillit umiarsuaatileqatigiiffiup angallataanut allamut MARI MARTEK-imut ikillugit Nuuliaanneqarput. Lasti immannguaannaq ajoquserpoq ikuallannerullu kingorna angallat nammineq Nuummukarsinnaasimavoq.
Søfartsstyrelsip paasiniaasartuisa pisimasoq misissorpaat nalunaarusiamilu aalajangersaallutik ikuallanneq qullermut ikkussivimmit, lastimi teqeqqumiittumit, pilersimasoq.
Pisimasoq Søfartsstyrelsip erloqinartoqartilluinnarpaa, tassa ikuallanneq aalisariutip angisuup HERCULES-ip 2007-imi erloqinartumik ikuallanneratut immat, taamanikkut inuit 11-t ajunaarlutik.
- Qullernut ikkussiviit allat Uilumi misissorneqarnerisa takutippaa qulliit ikkussiviillu akornanni attaveqarnerlunnera pissutigalugu ikuallattoqalernissaanut annertuumik ulorianartoqarsimasoq, paasiniaasartut allapput.
Paasiniaasartut aalajangersaapput qulliit lystofrørit atorneqarneranni ledninginut ulorianartumik kissattuunnginnissaat anguniarlugu ikkussorneqarnissaanut aalajangersakkat malinneqarsimanngitsut.
2007-imi HERCULES-imi ikuallannerup kingorna paasiniaasartut inassutigaat savalimmiut umiarsuarnik nakkutilliisoqarfia Skipaeftirlitiq suliniuteqassasoq nunanit amalaani umiarsuit qullilersorneranni piumasaqaatinik aalajangersaasoqarnissaanut.
Paasiniaasartut inassuteqaat taanna innersuussutigaat.
-Skipaeftirlitiq aamma Søfartsstyrelsip taanna tunuliaqutaralugu inasssutigaat IMO-p imaani isumannaatsuunissamut komiteanut (MSC) ataatsimut siunnersuumik nassiussisoqassasoq, taamaasillunilu "innaallagissatigut atortunut nalunginnaasumik piumasaqaatit" ilusilersuinermut atortunullu komitemut (DE) oqaluuserisassangortilugu, Søfartsstyrelsip paasiniaasartui allapput.
Ajutoornermi nalunaarusiaq tamaat atuarsinnaavat uani