Ataata inuulluarit

Jonathan Motzfeldtip pania Karen Motzfeldt ataatami ilisaanerani killitsinnartumik oqalugiarpoq.

- Ataata oqaasialuinnaat atorlugit qanoq ittuunersoq oqaatigissallugu ajornakusoorpoq, ilami eqqaamasassarpassuaqarpoq, misigisat pisorpassuillu.

Ataatami ilisaanerani oqalugiarnermini Karen Motzfeldt taama aallartippoq, ilisaaneralu killitsinnarlunilu pikkunarpoq, nunatsinni tamarmi tv-kut radiokkullu malinnaavigineqartoq. Karen Motzfeldt aqqaluaalu Claus Motzfeldt aamma Jonathan Motzfeldtip ukiuni 20-ni nulia Kristjana Jonathan Motzfeldtip ilisaanerani naggammik inuulluaqqusipput, Nuummi Hans Egedep Oqaluffiani nunami siuttuusimasutut ilisaammat.

- Inummut taamaattumut nukittoorsuarmut anguniakkaminik takorluukkaminillu angusinarnermi ilungersorluni sulisartumut meeraalluni soorunami pissanganarpoq, kisianni oqitsuinnaanngilaq. Ataatarput ilagalugu inuunerput siumut ilisimaneq ajorparput. Ilaquttanili qasuersaaqatigisarpai eqqissisimaarfigalugit, uagullu anoraasuaraarput isumassortigalugulu, taamaaliluta tamatta pikkoriffiginerusarput tunniuttartarparput. Ataatap inuuneq asavaa, aammami allanit inuunini pissarsiffiginerusimallugu. Allaat napparsimanermini attaveqarfigiuarpaatigut, oqarluni inuunitsinni inuuneq salliutissagipput. Oqariartuutaannimi taanna pingaarnerpaavoq: Inuunersi ingerlakkiartorsiuk, Karen Motzfeldtip oqalugiarnini naggaserpaa.

Biskop Sofie Petersenip oqaluussinermini Jonathan Motzfeldtip inunngorneraniit, meeraanera, inuusuttuunera, palasitut sulinera naalakkersuinikkullu ukiut 40-t sinnerlugit sulinera eqqartorpaa, namminersornerulernissatsinnik nammilersulernissatsinnillu ilungersuuteqarnera. Qanilaartuunera, inuunermik nuannarisaqarnera, inunnilu kikkunnilluunniit oqaloqateqarsinnaanera eqqartorpaa.

Naalakkersuisut siulittaasuata Kuupik Kleistip oqalugarnermi aallartinnerani Biibilimik issuaavoq, Jonathan Motzfeldtip pisuni ilungersunartuni issuartagaanik:

”Suut tamarmik aalajangersimasumik piffissaligaapput, qilaammi ataani pisartunut tamanut piffissaq aalajangersimasuusarpoq. Inunngorfissaqarpoq toquffissaqarlunilu. Naatitassanik ikkussuiffissaqarpoq ikkussukkanillu nutsuiffissaqarluni.” ”Alittuiffissaqarpoq mersuiffissaqarlunilu. Nipangersimaffissaqarpoq oqaluffissaqarlunilu. Asanniffissaqarpoq uumiginniffissaqarlunilu. Sorsuffissaqarpoq eqqissivissioqatigiiffissaqarlunilu.”

Junnuk, Biibilimi oqaatsit taakkorpiaat ilinnut pigitittarpakka. Oqaatsillu taakku imaannaangitsunik nalaataqarfinni issuarniartarpatit.Oqaatsit inuup kinaaneranik ilumoortumik oqaluttuartut inuunerup aqqutaani qanorluunniit pisoqaraluarpat inuit saammaasseqatigiittariaqarnerannik paasisariallit – suummi tamarmik aalajangersimasumik piffissaligaapput. Oqaatsit inuttut ilinnut ilisarnaataaginnaratik aammali tamatsinnut inuunitta ingerlanerani najoqqutassatut ingerlateqqitassaqqissuupput – qilaammi ataani pisartunut tamanut piffissaq aalajangersimasuusarpoq, Kuupik Kleist oqarpoq.

Aamma Jonathan Motzfeldt qutsavigaa inuiaqatigiit kalaallit namineernerulernissamut aqqutissiuussimammagit.

Han takkede også Jonathan Motzfeldt for at bane vejen for et mere selvstændigt grønlandsk folk.

- Qujavugut nunatsinnut ernerulluarlutit inuiaat kalaallit nammineernerulernissaat aqqutissiueqataaffigisimagakku, immitsinnut tatigaluta ataasiusutullu misigaluta - minnerunngitsumillu qujavugut illit Junnuk ulluni atorsaasuni ullunilu assoralisimaarfiusuni peqatigisarsimagatsigit – tassami sorsuffissaqarpoq eqqissivissioqatigiiffissaqarlunilu, Kuupik Kleist oqarpoq Jonathan Motzfeldtilu apuulluarnissaanik kissaallugu.

Ilisinermi tussiutit pingasut atorneqarput. Tassalu tussiut nr. 486: Sumunnarama nalunngilanga / Jeg lever – og ved hvor længe fuldtrøst. Tussiut nr. 568: Aarlorfigissavat Annaassisit. Tussiut nr. 525: Qiimasuttuaannarit, qallunaatut: nr. 784: Altid frejdig når du går.

Erinarsoqatigiit NIPE Ida Heinrich peqatigalugu erinarsorpaat tussiut nr. 568 Per Rosingimit siulersorneqarlutik: Annaassisoq.

Iliveqarfimmi tussiutit marluk atorneqarput: Jiisuserput uummarpoq, nr. 233 qallunaatut : Jesus lever, døden brast aamma tussiut: Qaamammat maani, qallunaatut nr. 121: Dejlig er jorden.

nalunaaqutaq 15:00-miit Katuami tamanut kaffillertoqarpoq.

Powered by Labrador CMS