Meeqqat imigassamut illersorneqarnerusariaqarput
Imigassamik ussaassaarinissamut maleruagassami nutaami naqissuserneqarpoq imigassaq meeqqanut inuusuttunullu naatsorsuussaanngitsoq. Selskab for Børnesundhedilli kissaatigaaq atuarfiit kommunillu aamma iliuuseqartariaqartut.
Imigassamik ussassaarinermi inuit takutinneqartut minnerpaamik 25-t sinnerlugit ukioqassapput. Aamma taamatut isikkoqassapput. Aamma tusagassiuutini isiginnaartut 30 procentii sinnerlugit meeraappata inuusuttuaraalutilluunniit imigassamik ussassaarisoqarsinnaanngilaq.
Taama isumaqarput Alkoholreklamenævnet marlunngormat Christiansborgimi imigassap ussassaarutigineqarnerapillugu ataatsimeersuarnermi maleruagassat ntaat saqqummiukkamikkik.
Alkoholnævnet ukini qulini atuussimapput taamaattumillu nalilersuisimallutik. Imagassamik ussassaarineq eqqarsaatigalugu maleruagassani nutaani meqqat inuusuttullu sutigut tamatigut salliutinneqarput.
- Isumaqarsimavugut pissutissaqarluartoq imigassap meeqqanut inuusuttunullu ussassaarutigineqannginnissaata pingaassusaa erseqqissassallugu. Oqariartuutaavoq ersarissoq aammalu ussassaarinermut tusagassiuutit meeqqat inuusuttullu atortagaat amerliartuinnarput, eqqartuussissuserisoq Ejvind Sandal Alkoholreklamenævnemi siulittaasoq oqarpoq.
Atuisut siunnersuisoqatigiivi imigassamut ataatsimiititaliami ataavartumik issiatitaqartut naqissuserpaat, imigassamik ussassaarinissamut maleruagassat iluaqutaassappata ussassaarinermi pissutsinut malinnaasariaqartut.
- Atuisut siunnersuisoqatigiivini erseqqissassallugu isumaqatigiissutigaarput meeqqat inuusuttullu illersortariaqartut, imigassarmi ukiukitsunut naatsorsuussaanngilaq, Atuisut siunnersuisoqatigiivini siulittaasoq Camilla Hersom oqarpoq.
Ullumikkut Alkoholreklamenævnet ussassaarinermik isorinnissinnaavoq - tunisassiortorlu allannguinngippat Forbrugerombudsmandi akuliuteqqullugu qinnuigisinnaallugu.
Pillaasinnaaneq
Camilla Hersom isumaqarpoq pillaasinnaanermut periarfissat misissussallugit pissutissaqartoq.
Meeqqat inuusuttullu nakorsaata Annette Storr-Paulsenip reklamenævnip siunnersuutaa ilassilluarpaa, isumaqarlunili meeqqat inuusuttullu imigassamut illersorniassagaani annertunermik aamma iliuuseqartoqartariaqartoq.
- Inuusuttut ussassaarineq taamallaat peqqutigalugu imigassartorneq ajorput. Imigassaq pillugu kulturerput angajoqqaallu imigasartoriaatsimik tikkuussisuussapput, Annette Storr-Paulsen oqarpoq aamma Dansk Selskab for Børnesundhedimi siulittaasuusoq.
- Meeqqat imigassartunngilluinnarnissaannik isumaqarunik kommunit atuarfiillu aamma iliuuseqartariaqarput, naqissusiivoq.
Naak 16-it inorlugit ukiulinnut imigassaq tupalu tuniniaqqusaanngitsoq misissuinerit takutippaat 2006-imiillu inuusuttut minnerpaamik ataasiarlutik imigassartorlutik aalakoortartut amerlassusaat marloriaatinngorsimasoq. Taamaattumik naalakkersuinikkut akuliunneq aamma iluaqutaanngilaq, Annette Storr-Paulsen isumaqarpoq.
- Inerteqquteqarsimavugut. Maannakkut tamanna kulturip allanngortinneranik malitseqartariaqarpoq, oqarpoq.